Тошкентда банкка ўйинчоқ тўппонча билан ҳужум қилинган эркак видео эълон қилинди

«Уйдан чиққанимда набирамнинг кичкина ўйинчоқ тўппончаси чўнтагимда қолиб кетган экан. Озгина олди бердим бор эди», — дея қилган ишини изоҳлади эркак.

Аввалроқ, Тошкентда эркак ўйинчоқ тўппонча билан банкни ўмармоқчи бўлгани ҳақида хабар бергандик. Тошкент шаҳар ИИББ ҳодиса содир бўлган вақтда кузатув камераларига тушиб қолган кадрларни эълон қилди.

Камералардан кўрилса, юзига ниқоб таққан шахс банк хизмат кўрсатиш шохобчаларидан бирига ўйинчоқ тўппончани кўтариб, бостириб киради ва банк ходимасини қўрқитиб, ундан пул талаб қилади.

Банк ходимаси эса ташвиш тугмасини босади ва уни кўрган эркак эса банкдан қочиб чиқиб кетади. Чақирув асосида воқеа жойига етиб келган ИИО ходимлари эркакни қўлга олишган.

«Эрталаб уйдан чиққанимда набирамнинг кичкина ўйинчоқ тўппончаси чўнтагимда қолиб кетган экан. Озгина олди бердим бор эди. Билмадим нега бу ишни қилдим ўзим ҳам ҳайронман. Қарзлар сабаб тушкунликка тушган эдим. Юнусободга келиб, шу ишни қилиб қўйдим. Ичкарига кирганимда, ўзимга ўзим айтдим, Зокир нотўғри иш қиляпсан. Кейин, ўзим чиқиб кетдим. Ҳеч кимга тегмадим, пул ҳам олмадим. Ҳаммадан узр сўрайман, агар кечиролсангиз, кечиринг», — дейди гумонланувчи эркак.

Мазкур ҳолат юзасидан Жиноят кодексининг 164-моддаси билан жиноят иши қўзғатилиб, қамоққа олиш тарзидаги эҳтиёт чораси қўлланилган.