Украинанинг Ўзбекистондаги элчиси дипломатик миссиясини якунламоқда
«Украина президенти Владимир Зеленский дипломатик корпус ротацияси доирасида менинг Ўзбекистондаги миссиямни якунлаш тўғрисида фармон қабул қилди. Бу мамлакатим раҳбариятига, халқимга бўлган ишончнинг энг юқори даражаси ва мен буни оқлаш учун қўлимдан келганини қилдим», — деб ёзди у.
Унинг қўшимча қилишича, у Ўзбекистондаги фаолияти давомида мамлакат учун оғир дамларда унинг манфаатларини ифодалаш ва ҳимоя қилиш шарафига муяссар бўлди.
«Ишимга баҳо бериш ҳуқуқини бошқаларга қолдираман, ўз номимдан фақат шуни айтаманки, қилган ишим учун уялмайман… Менинг вазифам ҳақиқатни айтиш, ҳақиқатни ўзбек жамиятига етказиш, уларга бугунги кунда Украина қандай яшаётганини тушунтириш эди. Умид қиламанки, меҳнатим туфайли ўзбек муҳитида ҳақиқат уруғлари кўпроқ униб чиқади», — деди у.
Дорошенко 2020 йил апрель ойида Украинанинг Ўзбекистондаги элчиси этиб тайинланганди. Ўша йилнинг октябрь ойида у Кўксарой қароргоҳида Ўзбекистон президентига ишонч ёрлиқларини топширган.
Николай Дорошенко бунга қадар Украина Ташқи ишлар вазирлиги тизимида, Украина президенти маъмурияти ва Миллий хавфсизлик ва мудофаа кенгашида ишлаган. У Украинанинг Россиядаги элчихонасида элчи маслаҳатчиси ва махсус топшириқлар бўйича элчи сифатида фаолият юритган. 2015 йилдан 2017 йилгача у Украинанинг Қирғизистондаги элчиси бўлган, сўнгра Ташқи ишлар вазирлигининг марказий аппаратига хизматга қайтган.
Дипломат Россия босқинига бир йил тўлиши арафасида — 2023 йил февралда Gazeta`га интервью берганди.