Ўзбекистон элчихонаси Украинани Мустақиллик куни билан табриклади

Ўзбекистоннинг Киевдаги элчихонаси Украина халқини Украина Мустақиллик куни билан табриклади. Табрик дипломатик ваколатхонанинг Facebook`даги саҳифасида эълон қилинди.

«Ушбу муҳим кун Украинанинг озодлик, суверенитет ва бирдамликка интилишини англатади, Украина халқининг руҳий қуввати, матонати ва тинчлик, барқарорлик ҳамда фаровонликка бўлган тинимсиз интилишини акс эттиради», — дейилади хабарда.

Элчихона Украина давлати ва фуқароларига тинчлик, тотувлик, фаровонлик ва янада муваффақиятли ривожланишни тилади.

Бугун Қозоғистон президенти Украина президенти Владимир Зеленскийга табрик телеграммасини йўллаганди.

Шунингдек, Озарбайжон президенти Илҳом Алиев ҳам Зеленскийни табриклаб, мамлакатлар «ҳудудий яхлитлик ва суверенитет масалаларида халқаро ҳуқуқ нормалари ва тамойилларига мувофиқ ўзаро қўллаб-қувватлаш ва бирдамлик кўрсатаётганини» таъкидлаган. «Озарбайжон дўст Украина халқига зарур инсонпарварлик ёрдами ва кўмагини кўрсатишда давом этади», дейилади табрикда.

Ўтган йили ҳам Ўзбекистон элчихонаси Украинани байрам билан табриклаганди. 2023 йилнинг шу кунида элчихона ўз сайтида Ўзбекистон президенти Шавкат Мирзиёевнинг Украина президенти Владимир Зеленский номига йўллаган табригини эълон қилган.