«Украин халқига тинчлик ва фаровонлик тилайман». Шавкат Мирзиёев Владимир Зеленскийга табрик йўллади
«Украинанинг миллий байрами — Мустақиллик куни муносабати билан сизни ва бутун Украина халқини самимий муборакбод этаман. Ишончим комилки, давлатларимиз ўртасидаги анъанавий дўстлик ва узоқ муддатли ҳамкорлик тамойилларига асосланган алоқалар келгусида ҳам халқларимиз умумий манфаатлари йулида ривожланиб бораверади», — деди Ўзбекистон президенти.
«Фурсатдан фойдаланиб, сизга мустаҳкам соғлиқ, оилавий бахт-саодат, масъулиятли фаолиятингизда муваффақиятлар, украин халқига эса тинчлик-омонлик ва фаровонлик тилаб қоламан», — дейди Шавкат Мирзиёев.
Мазкур табрик Ўзбекистон президенти матбуот хизмати тарафидан эълон қилинмади.
Ўз навбатида, Зеленский табрик учун Шавкат Мирзиёевга миннатдорлик билдирди.
«Ишончим комилки, давлатларимиз бундан буён ҳам Украина ва Ўзбекистоннинг дўст халқлари фаровонлиги йўлида самарали ҳамкорликни ривожлантириб, икки томонлама муносабатларни мустаҳкамлаб бораверади», — деди у.
«Украинанинг ҳудудий яхлитлиги ва украиналик болаларнинг Ўзбекистонда дам олиши учун инсонпарварлик ташаббуслари бўйича позициянгизни қадрлайман», — дея қўшимча қилди Зеленский.
Аввалроқ Ўзбекистон элчихонаси Украинани байрам билан табриклаганди.