Трамп Мирзиёевни Вашингтонда кутяпти — АҚШ президенти вакили Ўзбекистон раҳбари учун «Оқ уйга тўғридан-тўғри мурожаат йўли очиқлигини» айтди

Ўзбекистон президенти Шавкат Мирзиёев энди Оқ уйга тўғридан-тўғри мурожаат йўли очиқ ва Дональд Трамп уни Вашингтонда кутмоқда. Бу ҳақда АҚШ президентининг Жанубий ва Марказий Осиё бўйича махсус вакили Сержио Гор 22 сентябрь куни Шавкат Мирзиёев билан бўлган учрашувда маълум қилди.

Давлат раҳбарининг АҚШ ишбилармонлари билан учрашувида нутқ сўзлаган махсус вакил Трамп Шавкат Мирзиёев билан мулоқотдан завқ олганини таъкидлади.

«Мен президент Трампнинг махсус вакилиман. Ҳозиргина жаноб Трамп билан мулоқот қилдим. Бугун эрталаб у сизлар билан бўлишимни айтди ва дастуримизни кўриб чиқди. Президент Трамп менга биринчи айтган сўзи шундай бўлди, у сиз билан мулоқотдан катта завқ олди. У сизга ўзининг самимий саломини йўллади», — деди Гор.

Вакил Шавкат Мирзиёевга Вашингтонда уни Дональд Трамп кутаётганини маълум қилди.

«Энди эса сизда исталган вақтда Оқ уй офисига тўғридан-тўғри мурожаат йўли очиқ. Бу дегани муносабатларни мустаҳкамлаш учун зарур бўлган барча шарт-шароитлар мавжуд. Мен бу ердаги ўта самимий муносабатни президентга етказаман. У сизни Вашингтонда кутяпти. Ўзаро манфаатларга оид барча масалалар ҳал этилади. Биз сизнинг барча қарорларингизни қўллаб-қувватлаймиз», — деди Сержио.

«Сизлар Boeing 787 ни харид қилмоқдасиз ва президент бундан жуда мамнун бўлди ва яна айнан бугун эрталаб у сиз билан бўлган телефон орқали мулоқот ҳақида гапираркан, суҳбат жуда илиқ ва самимий ўтганлигини таъкидлади. Президент Дональд Трамп, АҚШ ва Ўзбекистон ўртасидаги муносабатларни қўллаб-қувватлаб келмоқда. Шунинг учун ҳам икки давлат ўртасидаги муносабатларни мустаҳкамлайдиган ҳуқуқий ҳужжат лойиҳаси қўллаб-қувватланади», — деди Трампнинг махсус вакили.

У икки мамлакат ўртасида савдо айланмаси тез суръатда ўсиб бораётганини таъкидлади. Янги келишув ва шартномалар уни янада равнақ топишини таъминлашини билдирди.

Бу ерда Boeing’дан ташқари соғлиқни сақлаш тизими, IT, стратегик минераллар соҳасида юқори натижаларга эга йирик компаниялар вакиллари бор. Улар Ўзбекистонда ўз бизнесларини ривожлантиришга тайёр. Жаноб президент, АҚШнинг барча йирик компаниялар вакиллари Ўзбекистонда ишончли ҳамкорга айланишни, биргаликда ишлашни истамоқда", — деди Гор.

Сержио Гор нутқини давом эттирар экан, у яна бир бор президент Трамп Шавкат Мирзиёев билан суҳбат қилишни жуда интиқлик билан кутаётганини қайд этди.

«Сизни Ўзбекистон футбол жамоаси жаҳон чемпионатига чиққани билан яна бир бор табрикламоқчиман. Энди Ўзбекистон жамоаси мундиалда. Икки мамлакат раҳбарлари ўртасидаги самимий мулоқот келгусида катта ютуқларга эришишимиз учун кенг йўл очиб беради», — деди махсус вакил сўзининг якунида.

Маълумот учун ушбу учрашувда Ўзбекистондаги давлат ташкилотлари ва хусусий компаниялар АҚШ компаниялари билан ҳамкорликка оид камида 10 та битимни имзолади.

Шундан сўнг Шавкат Мирзиёев махсус вакил Сержио Горни қабул қилди. Нью-Йорк шаҳрида фуқаро авиацияси, тоғ-кон саноати, молия ва инновациялар, кимё, энергетика ва бошқа устувор йўналишларда умумий қиймати 100 миллиард доллардан зиёд бўлган шартномалар ва истиқболли лойиҳалар портфели шакллантирилгани таъкидланди.

Нью Йоркда бўлиб турган журналист Азиза Қурбонова Сержио Гордан олган қисқа интервьюсида унинг Ўзбекистонга ташрифи ҳақида савол берди. «Яқин келажакда боришга умид қиламан», деган жавоб янгради.