Шавкат Мирзиёев Қатар амири Шайх Тамим бин Ҳамад Ол Соний билан учрашди

Доҳа шаҳрига амалий ташриф доирасида Шавкат Мирзиёев Қатар амири Шайх Тамим бин Ҳамад Ол Соний билан учрашув ўтказди. Бу ҳақда Ўзбекистон президенти матбуот хизмати хабар қилди.

Ўзбекистон — Қатар стратегик шериклик муносабатларини мустаҳкамлаш ва кўп қиррали амалий ҳамкорликни кенгайтириш масалалари кўриб чиқилди.

Суҳбат аввалида Ўзбекистон раҳбари Қатар амирини Ижтимоий ривожланиш бўйича иккинчи Жаҳон саммити тадбирларининг муваффақиятли ўтказилгани билан самимий табриклади.

Турли даражаларда мулоқот ва алмашинувлар олиб борилаётгани қайд этилди. Товар айирбошлаш ҳажми йил бошидан буён 45 фоизга ошгани таъкидланди. Қатарнинг етакчи компаниялари иштирокида йирик инвестиция лойиҳалари амалга оширилмоқда. Парламентлараро ва маданий-гуманитар алоқалар ривожланмоқда.

«Яшил» энергетика, транспорт, геология, тўқимачилик, туризм, инфратузилмани ривожлантириш ва бошқа йўналишларда кооперация лойиҳаларини илгари суришга алоҳида эътибор қаратилди.

Халқаро ва минтақавий аҳамиятга молик долзарб масалалар юзасидан ҳам фикр алмашилди.