Шавкат Мирзиёев «C5+1» саммитида иштирок этиш учун Вашингтонга жўнаб кетди

Шавкат Мирзиёев Қатарга амалий ташрифини якунлаб, АҚШ президенти Дональд Трампнинг таклифига биноан Марказий Осиё мамлакатлари ва АҚШ етакчиларининг «C5+1» форматидаги саммитида иштирок этиш учун Вашингтон шаҳрига жўнаб кетди. Бу ҳақда Президент матбуот хизмати хабар қилди.

Ташриф дастурига мувофиқ, Шавкат Мирзиёев АҚШ президенти Дональд Трамп, Конгресс Сенати ва Вакиллар палатаси аъзолари, АҚШ вазирлик ва идоралари раҳбарлари билан учрашувлар ўтказади.

Ўзбекистон билан АҚШ ўртасидаги стратегик шериклик муносабатларини, энг аввало, савдо-иқтисодий, инвестициявий ва гуманитар соҳаларда янада кенгайтириш ва мустаҳкамлаш, шунингдек, Марказий Осиёнинг АҚШ билан минтақалараро ҳамкорлигини чуқурлаштириш масалалари кўриб чиқилади.

Ишбилармонлик дастури доирасида АҚШнинг етакчи компаниялари ва молиявий институтлари раҳбарлари иштирокида учрашув ва тадбирлар ўтказилиши режалаштирилган.

Тадбирлар якунида қатор икки ва кўп томонлама ҳужжатлар қабул қилиниши кўзда тутилган.

Эслатиб ўтамиз, «C5+1» форматидаги биринчи саммит 2023 йил сентябрь ойида Нью Йркда бўлиб ўтганди.