Алишер Султанов президентнинг энергетик хавфсизлик бўйича вакили лавозимидан озод этилди
Фармоннинг бошқа тафсилотлари, жумладан, кетиш сабаблари ва янги тайинлов ҳақидаги маълумотлар ошкор этилмаган. Бу лавозим Президент администрациясидаги ўзгаришлардан кейин ташкил этилганди.
Алишер Султонов (1967 йилда туғилган) А.Ф.Можайский номидаги ҳарбий-муҳандислик институтини тамомлаган (1989). 1996 йилда нефть ва газ саноатида иш бошлаган.
2002−2013 йилларда «Шўртан газ-кимё мажмуаси» унитар шўба корхонасига раҳбарлик қилган. 2013−2015 йилларда «Ўзбекнефтгаз» АЖ Прогнозлаштириш, ресурслар ва инвестиция дастурлари бош бошқармаси бошлиғи — бошқарув раисининг биринчи ўринбосари, 2015−2018 йилларда «Ўзбекнефтгаз» акциядорлик жамияти бошқаруви раиси лавозимларида ишлаган.
2017−2019 йилларда бош вазир ўринбосари — Геология, ёқилғи-энергетика комплекси, кимё, нефть-кимё ва металлургия саноати масалалари комплекси раҳбари лавозимида ишлаган.
У 2019 йилнинг февралидан 2022 йилнинг апрелигача энергетика вазири лавозимида ишлаган. Расмий хабарда унинг соғлиғи сабабли бошқа ишга ўтгани муносабати билан бу лавозимни тарк этгани айтилган.
2023 йилда у президентнинг нефть-газ, кимё ва энергетика масалалари бўйича маслаҳатчиси этиб тайинланган. Ўшанда у энергетика, нефть маҳсулотлари, тоғ-кон саноати ва геология соҳалари, шунингдек ушбу йўналишларга масъул бўлган давлат органлари ва компаниялар фаолиятини мувофиқлаштирган. Улар қаторига Энергетика вазирлиги, Атом энергетикасини ривожлантириш агентлиги, Электр энергияси, нефть маҳсулотлари ва газдан фойдаланишни назорат қилиш инспекцияси, Тоғ-кон саноати ва геология вазирлиги ҳамда Тоғ-кон, геология ва саноат хавфсизлигини назорат қилиш инспекцияси киради.
Бундан ташқари, унинг масъулият доирасига «Ўзбекистон миллий электр тармоқлари», «Ҳудудий электр тармоқлари», «Иссиқлик электр тармоқлари», «Ўзбекнефтгаз», «Ҳудудгазтаъминот», «Ўзтрансгаз» ва UzGasTrade ҳам кирган.
2025 йил ёзида Президент администрацияси тузилмаси ўзгартирилгандан сўнг, унинг ваколатлари ўзгарган бўлиши мумкин.