Президент янги Yunusabad Gallery савдо ва бизнес марказини кўздан кечирди

Шавкат Мирзиёев Тошкентнинг Юнусобод туманидаги Yunusabad Gallery савдо ва бизнес марказига ташриф буюрди, деб хабар берди президент матбуот хизмати.

2,5 гектар майдонни эгаллаган мажмуа 53 минг квадрат метрдан ортиқ чакана савдо ва тижорат майдонларини ўз ичига олади. 14 млн долларлик хорижий инвестициялар билан бир қатор халқаро брендлар ташкил этилган.

Мажмуада 100 дан ортиқ савдо нуқталари жойлашган ва тахминан 500 иш ўрни яратилади. Марказ йилига 2,5 миллионгача ташриф буюрувчини қабул қилиши кутилмоқда.

Давлат раҳбари марказда жойлашган китоб дўконига ташриф буюрди ва у ерда нашриёт вакиллари ва ёш китобхонлар билан суҳбатлашди. У нашриёт саноати ва китоб савдосини ривожлантириш, мутолаа маданиятини болаликдан бошлаб тарғиб қилиш, илмий ва бадиий адабиётларни нашр этишни кенгайтириш ҳамда нашриётларни қўллаб-қувватлаш чораларини ишлаб чиқиш муҳимлигини таъкидлади.

Хабарда айтилишича, Шавкат Мирзиёев шаҳар аҳолиси билан ҳам суҳбатлашган.

Кейин президентга марказда офиси жойлашган Unicon-Soft IT компанияси фаолияти тақдим этилди. 2017 йилда ташкил этилган компания бутун мамлакат бўйлаб 70 дан ортиқ ахборот тизимларини ишлаб чиққан ва жорий этган.

Компаниянинг барча вилоятларда ва мамлакат бўйлаб 208 та туман ва шаҳарларда ахборот тизимларини жорий этувчи ва техник қўллаб-қувватловчи филиаллари мавжуд. Унда 1500 дан ортиқ ходим ишлайди, уларнинг 80 фоизи ёшлар.

Президент матбуот хизмати хабарига кўра, Unicon-Soft божхона секторини рақамлаштиришда иштирок этишни ва «Рақамли маҳалла» платформасини жорий этишни режалаштирмоқда. Президент компаниянинг ушбу соҳалардаги лойиҳалари тақдимотини кўриб чиқди.

Давлат раҳбари Юнусобод туманидаги Рихсилий кўчасида амалга оширилган ободонлаштириш ишларини ҳам кўздан кечирди. У ерда 24 соат ишлайдиган дўконлар, ресторанлар ва кўнгилочар масканлар пайдо бўлди. Натижада 650 та иш ўрни яратилди. 39 минг квадрат метр пиёдалар йўлаклари қурилди, қарийб 100 та видеокузатув камераси ва 10 га яқин фавқулодда чақирув тугмалари ўрнатилди.

Эслатиб ўтамиз, август ойида Gazeta нашри Рихсилий кўчсини ободонлаштириш ишлари давомида кўп қаватли уйга терраса қўшилгани ва биринчи қават ярим ертўлага айланиб қолгани ҳақида хабар берганди. Бу квартира аҳолиси учун ноқулайлик ва хавф туғдирган, туман ҳокимияти уларга янги яшаш шароитларидан қониқмаса, уйларини сотишни маслаҳат берган.