Ўзбекистоннинг Эфиопиядаги биринчи элчиси тайинланди

Ўзбекистоннинг Эфиопияга тайинланган биринчи элчиси Ашраф Ходжаев мамлакат президенти Тайе Ацке-Селассиега ишонч ёрлиқларини топширди, дея хабар бермоқда «Дунё» ахборот агентлиги.

Маросим доирасида бўлиб ўтган суҳбатда томонлар икки мамлакат ўртасидаги ҳамкорликни ривожлантириш истиқболлари юзасидан фикр алмашди. Эфиопия президенти муносабатлар ривожланишига ва давлатлар ўртасидаги амалий ҳамкорлик янада кенгайишига ишонч билдирди.

Маълумот учун, Ўзбекистон ва Эфиопия ўртасида дипломатик муносабатлар 1996 йил 15 июлда ўрнатилган.

Мамлакат Шарқий Африкада жойлашган бўлиб, шимолда Эритрея, шимоли-шарқда Жибути, шарқ ва жануби-шарқда Сомали, жанубда Кения, ғарбда Жанубий Судан ҳамда шимоли-ғарбда Судан давлатлари билан чегарадош. Аҳолиси тахминан 130 млн кишини ташкил қилади, Пойтахти Аддис-Абеба шаҳри.

Эслатиб ўтамиз, Ашраф Ходжаев 2024 йилнинг февраль ойидан буён Ўзбекистоннинг Қатардаги элчиси сифатида ишлаб келмоқда. 2025 йилнинг октябрь ойидан эса у бир вақтнинг ўзида Ўзбекистоннинг Жанубий Африкадаги элчиси этиб тайинланган.