Қирғизистон ва Ўзбекистон чегараолди ҳудудларини алмашди

Илгари Ўзбекистон ҳудудига тегишли бўлган иккита аҳоли пункти — Чўнғара ва Тош-Тобо чегараларни демаркация қилиш доирасида Қирғизистон таркибига кирди, деб хабар бермоқда Қирғизистон президенти матбуот котиби Аскат Алагозов ўзининг Facebook саҳифасида.

Алагозовнинг маълумотларига кўра, ушбу қишлоқларда 2,5 мингга яқин киши истиқомат қилади, уларнинг аксарияти этник қирғизлардир. Рўйхатдан ўтиш жараёнлари якунланганидан сўнг уларга Қирғизистон фуқаролиги берилади.

Facebook / Аскат Алагозов

«Кўрсатилган аҳоли пунктлари эвазига Қирғизистон томони Ўзбекистон Республикасига чегараолди ҳудудидан майдони бўйича тенг қийматли ер участкаларини топширди», — дея тушунтирди Қирғизистон раҳбарининг матбуот котиби. Айнан қайси ҳудудлар назарда тутилгани номаълум.

Алагозовнинг қўшимча қилишича, Сай ва Таян қишлоқлари ўртасида янги автомобиль йўли қуриш учун томонлар умумий майдони 236 гектар бўлган тенг қийматли ер участкаларини нуқтали тарзда алмашган. Ҳисоб-китобларга кўра, бу Қирғизистоннинг Боткен вилояти аҳолисига Айдаркен шаҳридан вилоят маркази Боткенга ҳозирги 225 км ўрнига тахминан 55 км йўл босиб етиб олиш имконини беради, деб таъкидлади у.

2022 йил декабрь ойида Қирғизистон ва Ўзбекистон ҳудудий баҳсларни ҳал қилганди ҳамда Андижон (Кампиробод) сув омборини биргаликда бошқариш тўғрисида битим имзолаганди, унда зарурат туғилганда Қирғизистоннинг яқин атрофдаги қишлоқларига сув етказиб бериш имконияти назарда тутилган.

Андижон сув омбори 1983 йилда қурилган бўлиб, СССР парчаланиб кетганидан кейин икки давлат ўртасидаги ҳудудий баҳс предметига айланганди. Қирғизистон-Ўзбекистон чегарасида вақти-вақти билан, хусусан, сув манбалари туфайли низолар келиб чиқиб турган.