Ўзбекистон терма жамоаси IPhO–2026да тарихий натижа қайд этди
Ўзбекистон терма жамоаси Колумбияда бўлиб ўтган 56-халқаро физика олимпиадаси (IPhO–2026)да тарихда илк бор икки кумуш ва икки бронза медални қўлга киритиб, мамлакат иштирокидаги энг юқори натижани қайд этди.
4–12 июль кунлари ўтказилган нуфузли халқаро олимпиадада мамлакатимиз шарафини ҳимоя қилган ёш физиклар юқори натижаларга эришди.
Кумуш медалларга «ТИҚХММИ» Миллий тадқиқот университети ҳузуридаги аниқ фанларга ихтисослаштирилган мактаб ўқувчиси Асилбек Жуманазаров ҳамда Мирзо Улуғбек номидаги ихтисослаштирилган мактаб ўқувчиси Муҳаммад Абдумаликов сазовор бўлди.
Бронза медаллар эса «ТИҚХММИ» Миллий тадқиқот университети ҳузуридаги аниқ фанларга ихтисослаштирилган мактаб вакили Элбек Уроқов ҳамда Қўқон шаҳридаги 1-сонли ихтисослаштирилган мактаб ўқувчиси Ҳасан Камоловга насиб этди.
Шунингдек, Мирзо Улуғбек номидаги ихтисослаштирилган мактаб ўқувчиси Жавоҳир Акназаров «Honorable Mention» махсус эътирофи билан тақдирланди.
Қайд этилишича, Ўзбекистон терма жамоаси ушбу олимпиада тарихида илк бор кумуш медалларни қўлга киритиб, мамлакатнинг IPhOдаги иштирокида энг юқори натижага эришди.
Халқаро физика олимпиадаси (IPhO) дунёнинг энг иқтидорли ёш физиклари иштирок этадиган нуфузли интеллектуал мусобақалардан бири бўлиб, унда иштирокчилар назарий ва амалий билимларини синовдан ўтказади.