Ислом Махачев навбатдаги жангини қачон ва кимга қарши ўтказмоқчи эканлиги маълум бўлди

Ярим ўрта вазн тоифасида UFC чемпиони Ислом Махачев Ян Мачадо Геррига қарши кечган беш раундлик жангдан сўнг тез орада яна октагонга қайтишни режалаштирмоқда. Филадельфияда ўтган UFC 330 турниридан кейинги матбуот анжуманида россиялик жангчи ўз режалари билан ўртоқлашди.

“Рамазонгача яна бир марта жанг қилишимиз керак. Январда ёки йил охиригача октагонга чиқишим лозим. Энди йигирма ёшли йигитча эмасман, ёшим 34 да ва иложи борича тез-тез жанг қилишим керак. Кўп вазн ташламайман, жиддий жароҳатларим ҳам йўқ. Эҳтимол, бурнимни яна бир марта текширтириб олишим керакдир, бироқ шунинг ўзи етарли”.

Шунингдек, Махачев ярим ўрта вазн тоифасига ҳали тўлиқ мослашиб улгурмаганини ва келгуси жанггача жисмонан кучаймоқчи эканини таъкидлади:

“Оғир жанглар инсонни тоблайди, мен ҳам янада кучайганимни ҳис қиляпман. Ҳали яна вазн йиғишим ва кучлироқ бўлишим керак, бунинг учун эса менда вақт бор. Ушбу жанг шуни кўрсатдики, тўқнашув қанчалик осон ёки қийин бўлмасин, мен учун у биринчи сониядан то охиргисигача ҳақиқий урушдир”.

Навбатдаги рақиб ким бўлиши ҳақидаги саволга эса россиялик жангчи анчадан буён титул жангига лойиқ бўлиб келаётган Карлос Пратесни танлаган бўлишини айтиб ўтди.

Манба: www.daryo.uz