Коби Браянт кийган либос аукционда рекорд нархга сотилди

NBA'нинг беш карра чемпиони Коби Браянт мактаб жамоасида ўйнаган пайтида кийган либос Sotheby’s аукционида 2,2 миллион долларга сотилди. Бу ҳақда New York Post хабар берди.

Браянт ушбу либосни Пенсилвания штатидаги Лоуер-Мерион мактаби жамоаси сафида тўп сурган вақтида кийган. Спортчи аукционда сотилган ушбу либосни 1995-йилнинг март ойида Хейзлтон жамоасига қарши ўйинда кийган.

Эътиборли томони шундаки, ушбу савдо мактаб баскетболи либослари учун тўланган энг юқори нарх сифатида қайд этилди. Бунгача рекорд Леброн Жеймсга тегишли эди. Унинг 2002-йилда Sports Illustrated журналининг “Танланган” сарлавҳали машҳур муқоваси учун тушган суратида кийган мактаб формаси 2024-йилда 1,3 миллион долларга сотилган.

Маълумот учун, бутун профессионал фаолиятини “Лос-Анжелес Лейкерс” сафида ўтказган Коби Браянт 2016-йилда баскетболчилик фаолиятини якунлаган. У NBA'да беш марта чемпион бўлган, АҚШ терма жамоаси билан эса икки бор Олимпия ўйинлари олтин медалини қўлга киритган.

Эслатиб ўтамиз, 2020-йил 26-январ куни Лос-Анжелес яқинида вертолёт ҳалокатга учраган эди. Фожиа оқибатида 41 ёшли Коби Браянт, унинг 13 ёшли қизи Жанна ва яна етти киши ҳалок бўлган.

Манба: www.daryo.uz