Aimchess Rapid. Нодирбек Абдусатторов мураккаб вазиятдан чиқиб кетиб, Со Уэслини мағлуб этди

Шахмат бўйича Aimchess Rapid онлайн турнирининг тўртинчи босқичи 10 июль, душанба куни старт олди. Ушбу мусобақанинг 1-дивизионида Нодирбек Абдусатторов кеча АҚШлик Со Уэслига қарши дона сурди.

Дастлабки 2 партияда дуранглар қайд этилган бўлса, учинчи партияда Абдусатторов оқ донада ўйнаб, ютқазиб қўйди. Ҳамюртимиз вазиятдан чиқиб кетиш учун сўнгги партияда қора доналарда ўйнаб ғалаба қозониши талаб этиларди. Бу партиянинг 45-юришида Нодирбек ғалаба келтириши мумкин бўлган ягона йўлни топа олди. У ўз Руҳини қурбон қилиш эвазига пиёдасининг Фарзинга чиқишини таъминлади. Натижада Уэсли таслим бўлди.

Ҳамюртимиз ҳал қилувчи бешинчи партияда эса оқ доналарда ўйнаб, 29-юришда рақибини мот қилди. Уэсли 19-юришда ўзбек шахматчисининг пиёдасини уриб олиб, қўпол хатога йўл қўйди. Ватандошимиз унинг бу хатосини кечирмади ва ўйинни ғалабагача олиб борди.

Нодирбек Абдусатторов ярим финалда Левон Арониан (АҚШ, 2743)га қарши баҳс юритади. Учрашув Тошкент вақти билан соат 20:00 да бошланади.

Манба: stadion.uz