Шавкат Мирзиёев МДҲнинг Фахрий нишони билан тақдирланди

МДҲ давлатлари раҳбарлари саммитида Қирғизистон президенти Садир Жапаров Ўзбекистон президенти Шавкат Мирзиёевни МДҲ Фахрий нишони билан тақдирлади. Садир Жапаров Шавкат Мирзиёевнинг дўстлик ва яхши қўшничилик муносабатларини мустаҳкамлашга қўшган ҳиссасини эътироф этди.

13 октябрь куни Бишкекда бўлиб ўтган МДҲга аъзо давлатлар раҳбарлари кенгашининг йиғилиши доирасида Ўзбекистон президенти Шавкат Мирзиёевга давлатлараро мукофот — МДҲнинг Фахрий нишони топширилди.

Қирғизистон президенти Садир Жапаров Шавкат Мирзиёевни «МДҲга аъзо давлатлар ўртасида жамият тараққиёти, дўстлик, яхши қўшничилик ва ўзаро манфаатли ҳамкорликни мустаҳкамлашга қўшган улкан ҳиссаси учун» тантанали равишда тақдирлади, деб хабар қилди қўшни давлат президенти матбуот хизмати.

Садир Жапаров ўз нутқида Шавкат Мирзиёевнинг дўстлик ва яхши қўшничилик муносабатларини мустаҳкамлаш, хавфсизлик ва барқарорликни таъминлаш, Марказий Осиё ва бутун МДҲ мамлакатлари давлатларининг барқарор ижтимоий-иқтисодий ривожланишига қўшган ҳиссасини эътироф этди.

«Таъкидлашни истардимки, унинг шахсий саъй-ҳаракатлари туфайли давлатлараро муносабатларда ҳамдўстликка аъзо давлатлар ўртасида мутлақо янги ўзаро ишонч ва конструктив ҳамкорлик муҳити яратилиб, ўзаро манфаатли муносабатларнинг ўсишига хизмат қилувчи савдо ҳамда инвестиция, саноат кооперацияси, транспорт ва сув-энергетика инфратузилмаси бўйича қўшма лойиҳаларни амалга оширишга қулай муҳит шаклланмоқда», — деди Қирғизистон президенти.

Садир Жапаров, шунингдек, Шавкат Мирзиёевнинг сиёсий иродаси туфайли Қирғизистон-Ўзбекистон давлат чегарасини делимитация қилиш жараёнини якунлаш имкони бўлганига ҳам эътибор қаратди.

«Газета.uz»да реклама

«Ушбу масаланинг ҳал этилиши барча соҳаларда қирғиз-ўзбек ҳамкорлигига ижобий динамика қўшиб, кўп йиллар давомида очиқ қолаётган муаммоларни ҳал қилишга туртки бўлди», — деди у.

«Ўзбекистон кейинги йилларда МДҲ фаолиятидаги иштирокига қандай сифат жиҳатидан янги динамика қўшганини барчамиз кўриб турибмиз. Ўзбекистон президенти ташаббуси билан ҳамкорликнинг муҳим йўналишлари қаторида транспорт йўлакларининг рақобатбардошлигини ошириш, норматив ҳужжатлар ва стандартларни уйғунлаштириш, келишилган тариф сиёсатини юритиш ва ўзаро преференциялар бериш борасидаги вазифалар изчил ҳал этилмоқда. МДҲ доирасида ўзаро савдодаги тўсиқларни тезкорлик билан бартараф этиш бўйича самарали чора-тадбирлар шулар жумласидан», — деди Садир Жапаров.

Нутқининг сўнгида Қирғизистон раҳбари Шавкат Мирзиёевга МДҲ мамлакатлари интеграциясига қўшган ҳиссаси, Ҳамдўстлик маконида ишбилармонлик алоқалари ва ҳар томонлама самарали ҳамкорликни ривожлантиришга қаратилган ташаббусларни доимо илгари сураётгани учун миннатдорлик билдирди.

Ўз навбатида, Ўзбекистон президенти Шавкат Мирзиёев Садир Жапаровни мукофотлаш ташаббуси учун миннатдорлик билдириб, бу унинг учун нафақат кутилмаган воқеа, балки катта масъулият ҳам эканини таъкидлади.

Шавкат Мирзиёев «Ўзбекистон мукофотни аванс сифатида қабул қилиб, Ҳамдўстликка аъзо давлатлар ўртасидаги ҳамкорликни мустаҳкамлаш учун барча саъй-ҳаракатларни амалга ошириш ниятида» эканини таъкидлади.

«Менимча, бу узоқ саёҳатнинг бошланиши. Ҳамдўстлигимизнинг ҳар бир мамлакати билан бутунлай бошқача тарзда ишлаш учун ҳамма нарсани қиламиз. Чунки бугунги мукофот ва сизларнинг ишончингиз Ўзбекистонга, Ўзбекистон президентига жуда кўп масъулият юклайди», — деди Ўзбекистон президенти.

Давлат раҳбари Қирғизистон, хусусан, Садир Жапаров билан ишончли ва яхши икки томонлама муносабатлар ўрнатилганини таъкидлаб, биргаликдаги саъй-ҳаракатлар билан 30 йил ичида бошқалар қила олмаган нарсага эришганини таъкидлади.