Андижонда АГТКШ шохобчаси газ нархини сунъий оширганлиги учун фаолияти вақтинча тўхтатилди

Ушбу АГТКШ истеъмолчиларга 1 метр куб сиқилган газни 3 600 сўмдан сотган.

Куни кеча Андижон вилояти Жалақудуқ туманидаги метан заправкада 1 метр куб сиқилган газни 3 600 сўмдан сотилаётгани айтилган видео ижтимоий тармоқларга сиздирилди. Ушбу ҳолат юзасидан Электр энергияси, нефть маҳсулотлари ва газдан фойдаланишни назорат қилиш инспекцияси расмий муносабат билдирди.

Ушбу ҳолатга аниқлик киритиш мақсадида «Ўзэнергоинспекция» Андижон ҳудудий бошқармаси томонидан ўрганиш ўтказилди. Унга кўра, Вазирлар Маҳкамасининг 2023 йил 15 сентябрдаги 475-сонли қарори талаблари юзасидан огоҳлантириш берилишига қарамасдан, мазкур шохобчада 1 метр куб сиқилган газ 3 600 сўмдан сотилаётгани аниқланди.

«Ушбу қоидабузарлик юзасидан ҳужжатлар расмийлаштирилди ҳамда мазкур шохобча газ тармоғидан ажратилиб, унинг фаолияти вақтинча тўхтатилди», — дейилади хабарда.