Тошкент вилоятида 800 мингдан ортиқ пиротехника воситалари аниқланди
Умумий қиймати қарийб 360 млн сўм бўлган пиротехника воситалари муомаладан олинди.
Тошкент вилояти ИИББ
хабарига кўра, Оҳангарон туманида Водий-Тошкент йўналиши бўйлаб ҳаракатланиб келаётган Isuzu юк машинаси ҳудудий ИИБ, ДХХ ва Божхона ходимлари томонидан ўрнатилган тартибда текширилган.
Натижада, дарахт кўчатлари остига беркитилган ҳолатда, картон қутиларга жойлаштирилган қиймати 144 млн сўм бўлган пиротехника воситалари борлиги аниқланган ва далилий ашё сифатида ҳужжатлаштирилиб олинган.
Қайд этилишича, мазкур йўналишда ўтказилган тезкор-профилактик тадбирлар давомида турли ҳажм ва кўринишдаги умумий қиймати 356,4 млн сўм бўлган 805 минг дона пиротехника воситалари аниқланган ва қонуний тартибда муомаладан олинган.
Ҳудудда криминоген вазият барқарорлигини таъминлаш мақсадига қаратилган мазкур йўналишдаги назорат тадбирлари давом этмоқда.
