Бортдаги безорилик: “Пулково” аэропортига қўнишга мажбур бўлган UzAirways 22 минг долларни йўқотган

Ўзбекистон, Тошкент – Batafsil.uz. Uzbekistan Airways компанияси самолётнинг Санкт-Петербург аэропортига қўниши туфайли жиддий зарар кўрган. Бу ҳақда мухбиримиз хабар бермоқда.

Эслатиб ўтамизки, 11 декабрь куни Нью-Йоркдан Тошкентга учаётган авиакомпания самолёти ўз хатти-ҳаракати билан бошқаларга таҳдид солган безори йўловчи туфайли захира аэродромга йўл олган ва Санкт-Петербургдаги “Пулково” аэропортига қўнган.

Содир бўлган воқеанинг айбдори – 32 ёшли Ўзбекистон фуқароси ҳуқуқни муҳофаза қилиш идораси ходимлари томонидан рейсдан туширилган.

«Йўловчилар ва экипаж аъзоларининг ҳаёти ва соғлиғига таҳдид солган ҳуқуқбузарга нисбатан безорилик моддаси бўйича жиноий иш қўзғатилди», – дея хабар берган ИИВнинг транспорт ва туризм объектларида хавфсизликни таъминлаш Департаменти.

Самолётнинг мажбурий қўниши туфайли авиаташувчига етказилган зарар 22,2 минг долларга баҳоланмоқда.