Бу йил Ўзбекистондан икки мингдан ортиқ бебаҳо ноёб буюмларни олиб чиқишга ҳаракат қилинган
Бу тўғрисида Миллий матбуот марказида бўлиб ўтган матбуот анжуманида Маданий мерос агентлиги директорининг биринчи ўринбосари Турсунали Қўзиев маълум қилган.
«2023 йилда мамлакатдан олиб чиқишга уриниш чоғида жами 1,6 миллиард сўмлик 2 036 та объект қўлга олинди, натижада 210 та эксперт хулосаси тайёрланди», — деди агентлик директорининг биринчи ўринбосари.
Бир йил давомида маданий мерос обектлари ва уларга туташ ҳудудларда агентлик ходимлари томонидан 160 та ноқонуний иш – 25 та жиноий ва 135 та маъмурий ишлар аниқланган ва ҳуқуқни муҳофаза қилиш органларига топширилган, уларнинг зарари 28 миллиард сўмдан ошган.
Хабар қилинишича, энди республика ҳудудида жойлашган яна 5240 та моддий маданий мерос объектлари агентлик ҳимоясига олинган, 6780 та маданий мерос объектлари жамоат инспекторлари томонидан назорат қилинади. Умуман олганда, 53 та маданий мерос обектини тиклаш учун 49,1 миллиард сўм маблағ ажратилган.
«2023 йил давомида музейларга беш миллионга яқин маҳаллий ва халқаро сайёҳлар ташриф буюришди. Аста – секин музей соҳасига ахборот технологиялари жорий этилмоқда: 46та давлат музейи Миллий музей фондининг www.davkatalog.uz электрон каталог тизимига уланган бўлиб, уларнинг тўпламларидан 1,3 миллионга яқин экспонатлар рақамлаштирилган», — деди Турсунали Қўзиев.
Таъкидлаш лозимки, маданий мерос агентлиги музейларнинг инклюзивлиги ва уларнинг алоҳида эҳтиёжли одамлар учун мавжудлиги устида ишламоқда. Музейларда пандус ва лифтлар ўрнатилмоқда, имконияти чекланганлар ва фахрийларнинг қулай фойдаланиши учун аудиогидлар жорий этилмоқда.