АИ-80 бензинидан бутунлай воз кечиш бўйича 3 йилдан бери ишлар олиб борилмоқда – "Ўзбекнефтгаз" АЖ раиси ўринбосари

Одил Темировнинг сўзларига кўра, АИ — 80 бензинидан фойдаланишни бир йилга тўхтатиш бутун республика бўйлаб углерод оксиди чиқиндиларини 17 минг тоннага камайтиришга олиб келади.

«Ўзбекнефтгаз» АЖ бошқарув раиси ўринбосари Одил Темировнинг маълум қилишича, 3 йилдан бери АИ — 80 бензинидан бутунлай воз кечиш бўйича ишлар олиб борилмоқда.

Айни пайтда Бухоро нефтни қайта ишлаш заводида Хитой компанияси билан ҳамкорликда модернизация ишлари олиб борилаётганини таъкидлади.

«Бизнинг ҳисоб-китобларга кўра, 1 йил ичида АИ — 80 бензинидан фойдаланишни тўхтатсак, бу бутун республика бўйлаб атмосферага карбонат ангидрид гази чиқиндиларини 17 минг тоннага камайтиришга олиб келади. Шундай қилиб, бу нафақат ускунанинг ишлаш муддатини узайтиради, балки атроф-муҳитга ҳам ижобий таъсир кўрсатади», — деди Одил Темиров.

Эслатиб ўтамиз, кеча Шавкат Мирзиёев Бош вазир Абдулла Ариповга 2025 йилдан бошлаб АИ — 80 бензинидан воз кечиш масаласи устида ишлаш бўйича топшириқ берган эди.

Ушбу чора-тадбирлар атроф-муҳитга салбий таъсирни камайтириш зарурати билан боғлиқ.