34 ёшли аёл 24 соат ичида турникда тортилиш бўйича Гиннес рекордини ўрнатди
34 ёшли австралиялик Оливия Винсоннинг айтишича, рекордни янгилашни унга эри ва мураббийи таклиф қилган экан. Аёлнинг сўзларига кўра, у дастлаб “бу имконсиз деб ўйлаб, кулиб юборган”. Ўша пайтдаги рекорд бир кунда 4081 марта тортилиш эди. Бу рекордни 2021 йилда полшалик Паула Горло ўрнатган.
Бироқ бир оз вақт ўтгач, австралиялик аёл “ҳисоб-китоб қилиб кўриб”, рекордни янгилаши мумкинлигига ишонч ҳосил қилган.
Винсон биринчи уринишни 2024 йил сентябрида, уч ойлик машғулотлардан сўнг амалга оширган. Ярим йўлда у жароҳатланиб, билак мушаклари пайи чўзилган ва тўхташга мажбур бўлган.
Шундан сўнг Винсон икки ой давомида соғлигини қайта тиклаб, яна бир неча ойлик машғулотлардан сўнг, иккинчи уринишни амалга оширган ва бу сафар муваффақиятга эришган.
Винсоннинг айтишича, 19 соатлик тортилишдан сўнг у “кучли кўнгил айнишни ҳис қила бошлаган”.
“Менимча, бу ҳаддан ташқари чарчаганимдан бўлган. Мен шунчаки вазифани иложи борича яхшироқ бажаришим керак эди. Танам бардош бера оладими, деган хавотирда эдим”, дейди спортчи.
Натижада у 24 соат ичида 7079 марта тортилишга эришган. Яъни у бир дақиқада ўртача беш марта тортилган.
“Спорт билан шуғулланишни энди бошлаганимда ўзим учун имконсиз деб билган натижаларга эришдим. Менимча, мумкин бўлган чегараларни кенгайтиришда чуқур инсоний табиийлик бор”, дейди Винсон рекордни янгилаганидан сўнг.
Март ойида 108 ёшли япониялик Шицуи Хакоиси сартарош бўлиб ишлаётган дунёдаги энг кекса аёл деб тан олинди ва Гиннеснинг рекордлар китобига киритилганди.
Мат ойи ўрталарида эса профессионал цирк артисти, сочидан осилиб туриш бўйича мутахассис, 39 ёшли Лейла Нун Гиннес рекордини янгилади. У ўзининг сочидан 25 дақиқа 11,3 сония давомида осилиб турган.
Манба: daryo.uz