Саида Мирзиёева: «Қорақалпоғистон келажаги — асосий миллий устувор вазифалардан бири»
У ҳудудни ривожлантириш давлат сиёсатининг муҳим йўналишларидан бири эканини таъкидлади.
«Қорақалпоғистон келажаги — бизнинг асосий миллий устувор вазифаларимиздан бири. Гап нафақат режалар, балки реал ҳаракатлар ҳақида кетмоқда. Ҳукумат ва президент маъмурияти аллақачон аниқ дастурларни ишга туширган, бюджетлар ажратган, ишларни мувофиқлаштириш бўйича гуруҳлар тузилган», — деди у.
«Қаттиқ иқлим ўзига хос табиий гўзаллик ва туризм имкониятлари билан бирга намоён бўлади. Агар биз инсон капиталига сармоя киритсак, даромад жуда катта бўлади: ҳудуд иқтисодиётининг ўсиши ва ҳар бир аҳоли учун ҳаёт сифатининг ошиши», — таъкидлади президент ёрдамчиси.
У инвесторларни эҳтимолий ўзгаришлар кўламини кўриш учун ҳудудга ташриф буюришга чақирди. «Барчамиз кенгроқ ўйлашимиз керак — бу ҳудудни қандай ўзгартиришимиз ва бутун мамлакат келажагига таъсир қилишимиз мумкинлигини тасаввур қилишимиз керак. Порлоқ келажакка эришиш мумкин. Ҳамма учун», — деди Мирзиёева.
Унинг сўзларига кўра, Boston Consulting Group консалтинг компанияси билан биргаликда Қорақалпоғистонни 2035 йилгача ривожлантириш стратегияси ишлаб чиқилган. Унда устувор йўналишлар сифатида энергетика, саноат, қишлоқ хўжалиги ва туризм белгиланган.
«Стратегия одамлар ҳаётини яхшилашга асосланган. Бу кўпроқ иш ўринлари, яхши инфратузилма ва жамоатларга сармоя киритишни англатади», — дея тушунтирди у.
Саида Мирзиёева, шунингдек, ҳудуднинг рақобатбардош афзалликлари: «яшил» энергия ва табиий газ ресурслари, унумдор ерлар ва барқарор туризм истиқболларини очадиган бой маданий мерос мавжудлигини таъкидлади.
«Мақсадимиз нафақат инвестицияларни жалб қилиш, балки у одамларга фойда келтириши, тадбиркорларни қўллаб-қувватлаши, ёшлар келажагини яратиши ҳамдир», — деди президент ёрдамчиси.
Якунда у Қорақалпоғистон ривожида иштирок этаётган барчага миннатдорлик билдирди ва салоҳиятли инвесторларга мурожаат қилди:
«Илиқ қалбим билан мен Ўзбекистондан ва бутун дунёдан янги ҳамкорларни бизга қўшилишга таклиф қиламан. Келинг, биргаликда Қорақалпоғистон муваффақиятининг янги бобини ёзайлик».
Қорақалпоғистоннинг инвестицион салоҳияти
Унинг сўзларига кўра, Қорақалпоғистон бир қатор рақобатдош устунликларга эга — стратегик географик жойлашувидан тортиб малакали меҳнат ресурслари ва ривожланган инфратузилмагача.
«Қорақалпоғистон ҳақиқатан ҳам бой тарих, бетакрор ва ранг-баранг маданият ҳамда бизнес юритиш учун катта истиқболларга эга бўлган ноёб ҳудуд ҳисобланади», — деди у.
Оринбоев ҳудудда муҳим транспорт йўналишлари, жумладан, 925 километр темирйўл, Нукус ва Мўйноқда иккита халқаро аэропорт борлиги, аҳоли сони 2 миллиондан ошганини, уларнинг ярмидан кўпи 30 ёшгача бўлган ёшлар эканини алоҳида таъкидлади.
«Бу эса, албатта, келажакда малакали кадрлар билан барқарор таъминлаш учун мустаҳкам пойдевор ҳисобланади», — дея қўшимча қилди у.
Президент ташаббуси билан кейинги йилларда Қорақалпоғистон эътибор кучайган ҳудудга айлангани унинг сармоявий жозибадорлигини оширганини таъкидлади.
«Сўнгги уч йилда Қорақалпоғистон ҳаётининг турли соҳаларини мақсадли ривожлантиришга қаратилган муҳтарам президентимизнинг ва ҳукуматимизнинг 24 та муҳим қарорлари қабул қилинди», — деди республика парламенти спикери.
2020−2024 йилларда Қорақалпоғистонда умумий қиймати қарийб 4 миллиард долларлик 4,5 мингга яқин лойиҳа амалга оширилган. Қуёш панеллари ишлаб чиқариш, иссиқхона мажмуалари, этнокластерлар ва меҳмонхоналар яратиш лойиҳалари шулар жумласидан.
Сўнгги беш йилда тўғридан-тўғри хорижий инвестициялар улуши 1,6 бараварга ошди, бу «ҳудуддаги инвестиция муҳитининг яхшиланиб бораётганидан ҳам далолат», деди Оринбоев.
Айни пайтда ҳудудда 2,5 миллиард долларлик 515 лойиҳа амалга оширилмоқда. У мисоллар келтирди: базальт асосидаги иссиқлик изоляцион материаллар ишлаб чиқариш, конгресс-ҳоллар ва беш юлдузли меҳмонхоналар қуриш, паррандачилик фермаларини яратиш.
Келгусида сармоя киритишнинг устувор йўналишлари ҳам белгиланди: кимё саноати, фармацевтика, қишлоқ хўжалиги, озиқ-овқат саноати, туризм, меҳмонхона ва транспорт бизнеси.
«Инвесторлар учун индивидуал имтиёзлар ва қулай шароитлар яратилган: асосий солиқ тўловларининг 50 фоизгача қисқартирилиши, электр энергияси учун 15 фоизлик имтиёзли тарифлар, бизнес очиш ва ер участкаларини ажратиш бўйича маъмурий жараёнларнинг соддалаштирилгани, бўш турган объектларни етти йилгача бўлиб-бўлиб тўлаш имкониятларининг яратилгани», — деди Жўқорғи Кенгес раиси.
Якунда у форум иштирокчиларини ҳудуд бўйлаб сармоявий саёҳатга таклиф қилди.
Ўтган йилнинг август ойида президент Шавкат Мирзиёев Саида Мирзиёева ва президент маслаҳатчиси Турсинхан Худайбергеновга Қорақалпоғистонни ривожлантириш бўйича топшириқлар ижросини назорат қилиш вазифасини юклаганди. У Кегейли туманида бўлиб ўтган йиғилишда ҳудудни ривожлантириш бўйича фойдаланилмаётган имкониятларни санаб ўтган.