Ўзбекистон ва Туркманистон президентлари чегараолди савдо зонасини ишга туширди

Ўзбекистон президенти Шавкат Мирзиёев ва Туркманистон президенти Сердар Бердимуҳамедов душанба куни Тошкентдан масофадан туриб «Шовот-Тошҳовуз» қўшма чегараолди савдо зонасини ишга туширди. Бу ҳақда Ўзбекистон раҳбари матбуот хизмати хабар берди.

Зонанинг фаолияти Ўзбекистоннинг Хоразм вилояти ва Туркманистоннинг Тошҳовуз вилояти — умумий аҳолиси 3,5 миллиондан ортиқ бўлган икки муҳим минтақа ўртасидаги савдо-иқтисодий алоқаларни ривожлантиришга хизмат қилишига ишонч билдирилди.

Зона ҳудудида савдо павильони ва омборхоналардан ташқари дирекция, божхона, карантин, фитосанитария ва ветеринария хизматларининг маъмурий бинолари жойлашган.

У ерда «ягона дарча» тамойили асосида давлат хизматлари кўрсатилади, интерфаол тизимлар, банк, тиббиёт ва меҳмонхона хизматлари учун зарур инфратузилма, шунингдек, катта автотураргоҳ ҳам ташкил этилган.

Президентлар ўртасидаги музокаралар

Сердар Бердимуҳамедов давлат ташрифи билан Ўзбекистонда бўлиб турибди. Давлат раҳбарларининг шу куни бўлиб ўтган музокараларида икки мамлакат ўртасидаги дўстлик, яхши қўшничилик ва стратегик шериклик муносабатларини кенгайтириш масалалари кўриб чиқилди.

Хусусан, ўзаро савдони кўпайтириш, саноат, энергетика, транспорт, машинасозлик, қишлоқ ва сув хўжалигида самарали кооперацияни илгари суриш масалалари муҳокама қилинди. Учинчи Ҳудудлар форумини Хива шаҳрида ўтказишга келишиб олинди.

Сўнгги йилларда ўзаро савдо ҳажми 2 баробарга ошиб, ўтган йил якунларига кўра 1,15 миллиард долларга, 2025 йилнинг биринчи ярмида эса қарийб 500 миллион долларга етгани таъкидланди.

Президентлар номенклатурани кенгайтириш ва эркин савдо режимидан самарали фойдаланиш орқали бу кўрсаткични 2 миллиардга етказиш учун барча имкониятларни кўрсатиб ўтди.

«Шовот-Тошҳовуз» чегараолди савдо зонасининг иш тажрибасини бошқа ҳудудларда, биринчи навбатда, «Олот (Бухоро вилояти) — Фараб (Лебоб вилояти)» ҳудудида қўллаш режалаштирилмоқда.

Қурилиш материаллари, фармацевтика, озиқ-овқат ва бошқа талаб юқори бўлган маҳсулотлар ишлаб чиқариш бўйича янги лойиҳаларни ишга туширишга бизнесни жалб қилиш масалалари муҳокама қилинди.

Энергетика соҳасида томонлар янада кенг кўламли лойиҳаларга, шу жумладан, истиқболли конларни биргаликда ўзлаштиришга ўтишга келишиб олдилар.

Транспорт соҳасида мамлакатлар Туркманбоши портини биргаликда ривожлантириш ва пойтахтлар ўртасида тўғридан-тўғри авиақатновларни тиклашга келишиб олди.