Жавоҳир Синдаров: «Финалда ҳам қўлимдан келганича энг яхши ўйинимни кўрсатишга ҳаракат қиламан»
— Сиз нафақат ФИДE Жаҳон кубоги финалига, балки Номзодлар турнирига ҳам йўлланма олдингиз. Ҳозир ўзингизни қандай ҳис қиляпсиз?
— Жуда хурсандман, лекин дўстим учун барибир бироз хафаман. Биз жуда яхши курашдик. Тай-брекдаги икки рапид партияда ҳам тайёргарлигим анча яхши эди, шунинг учун яхши позициялар олдим, деб ўйлайман.
Классик ўйинда у жуда мустаҳкам, яхши тайёрланган. Агар испанча, итальянча ёки бошқа дебютни танласам, бу ўйинда юта оламанми ёки қизиқарли позиция чиқадими, аниқ билмасдим. Шунинг учун тезроқ дуранг қилиш ва ҳаммасини рапид ҳамда блицда ҳал қилиш варианти менга маъқулроқ туюлди. Чунки бу вақт назоратларида ўзимни бироз яхшироқ ҳис қиламан. Лекин барибир Нодирбек ҳам бу ерда ўз даражасини кўрсатди, жуда яхши ўйнади. Мен озгина омадим келганини ҳам ҳис қиляпман. Номзодлар турнирига йўлланма олганимдан жуда бахтиёрман — бу менинг жорий йилги энг катта мақсадим эди. Энди кейинги турнирларимда Номзодлар учун тайёргарликни бошлайман.
— Лекин Номзодларгача ҳали жаҳон кубооги финали ҳам бор. Тай-брекни 2:0 ҳисобида ютгандан кейин финал олдидан ўзингизни қанчалик ишончли ҳис қиляпсиз?
— Ҳозир Вей Йи — Есипенконинг ўйини тугади, Андрей битта юришда катта хато қилди. Ҳар иккиси ҳам жуда кучли шахматчи, Вей Йи билан анча кўп ўйнаганман. Унга қарши ҳам қўлимдан келганича яхши шахмат ўйнашга ҳаракат қиламан. Менинг катта режаларимдан бири Номзодлар турнирига чиқиш эди, уни бажардим, энди бироз тинчланиб, Вей Йига қарши финалга яхши кайфиятда чиқишга ҳаракат қиламан.
—Ўзингиздан ташқари бу ерда укангизни ҳам кўряпмиз. У айнан турнирнинг шу босқичи учун келдими?
— Ҳа, укам кеча кечаси келди. У мен учун жуда кўп ширинликлар, шоколадлар, миллий таомларимизни ҳам олиб келди. Оилам ҳам бу ерда — бобом, бувим ҳам келишган. Жуда хурсандман, бундай пайтда яқинларим ёнимда бўлгани менга катта куч беради. Энди финалда ҳам қўлимдан келганича энг яхши ўйинимни кўрсатишга ҳаракат қиламан.
Манба: https://t.me/uzchesss