Мақташ замони ўтди, муаммони билишим керак — президент

Шавкат Мирзиёев 2 декбрь куни Халқ депутатлари Жиззах вилояти кенгашининг навбатдан ташқари сессиясида сўзга чиққанлар мақтов эмас, таклиф ва муаммоларни айтишга чақирди. «Минбар» Telegram канали ушбу сессиядан парчани эълон қилди.

«Ҳар бир туманда [йиғилишда] сўз берганимизда, илтимос, мақташ замони ўтиб бўлди. Менга таклиф керак, менга муаммо керак. Мен шуни билиб кетишим керак ва ўзимга тўғри йўл топишим керак», — деди давлат раҳбари.

Сессияда Жиззах вилоятининг ижтимоий ва иқтисодий масалалари кўрилмоқда.

Шунингдек, унда ташкилий масала кўрилиб, 2024 йилнинг декабридан буён Жиззах вилояти ҳокими вазифасини бажарувчи сифатида ишлаб келаётган Улуғбек Мустафоев вилоят ҳокими этиб тасдиқланди.