Ўзбекистонлик теннисчи Камилла Раҳимова Анжеда WTA 125 чемпионига айланди

Ўзбекистон терма жамоаси вакили Камилла Раҳимова Франциянинг Анже шаҳрида якунланган WTA 125 Open Angers Arena Loire турнирида чемпионликни қўлга киритди. Ҳал қилувчи финал учрашувида Камилла германиялик Татьяна Корпачни 6–3, 7–6(4) ҳисобида мағлуб этди.

Финалнинг илк дақиқалариданоқ Раҳимова кортда барқарорлик ва тажовузкор ўйин намойиш қилди. Биринчи сетда у тезда устунликни қўлга олиб, 6–3 ҳисобида ғалабага эришди. Иккинчи сетда тенг кураш кузатилди, аммо Камилла асосий вазиятларда совуққонликни сақлаб, тай-брейкда 7–6(4) ҳисобида устун келди.

Камилланинг чемпионлик сари йўлида турнирнинг иккинчи рақамли теннисчиси — хорватиялик Ана Ружич устидан қозонган 4–6, 6–3, 7–5 ҳисобидаги иродали ярим финал ғалабаси ҳафтанинг энг ёрқин лаҳзаларидан бири бўлди.

Анжедаги ғалаба Раҳимованинг WTA 125 даражасидаги жорий мавсумдаги илк чемпионлиги бўлиб, унинг Ўзбекистон байроғи остида ўтказган муваффақиятли стартнинг муҳим босқичига айланди.

Ўзбекистон теннис федерацияси Камилла Раҳимовани ёрқин ғалаба билан табриклайди ва келгуси турнирларда омад тилаб қолади.

Ўзбекистон теннис федерацияси матбуот хизмати

Манба: stadion.uz