Италиянинг Ўзбекистондаги янги элчиси вазифасига киришди

Ўзбекистон ташқи ишлар вазири Бахтиёр Саидов Италиянинг янги тайинланган элчиси Гвидо Де Санктисдан ишонч ёрлиқлари нусхаларини қабул қилди, деб хабар берди ТИВ раҳбари ўз Telegram каналида.

Томонлар икки томонлама ҳамкорликни, хусусан, савдо, инвестиция ва иқтисодий алоқаларни кенгайтириш масалаларини муҳокама қилишди. Улар шерикликни ривожлантириш ва бизнес ҳамжамиятлари ўртасидаги алоқаларни рағбатлантириш муҳимлигини таъкидлади.

«Мен Тожикистонда ҳам аккредитациядан ўтган ҳолда Тошкентда ўз миссиямни бошлаганимдан жуда фахрланаман. Мен сиёсий мулоқотни, иқтисодий, илмий ва маданий ҳамкорликни, институционал алмашинувларни мустаҳкамлаш, шу жумладан, „Италия — Марказий Осиё“ ташаббуси доирасида бизнес ва фуқаролар учун имкониятларни кенгайтириш устида ишлайман», — деганди янги элчи тайинловдан сўнг.
https://twitter.com/ItalyMFA/status/2008229217276710917/photo/1
Гвидо Де Санктис Римдаги LUISS университетини сиёсий фанлар бўйича тамомлаган ва 1991 йилда дипломатик хизматга қўшилган. У Ливия, Украина, Швейцария ва Россиядаги Италия элчихоналарида, шунингдек, Италия Ташқи ишлар вазирлигида ишлаган.

Шунингдек, у Италиянинг Қатардаги элчиси, Албаниядаги ЕХҲТ миссиясининг координатори ва кейинчалик Италия мудофаа вазирининг дипломатик маслаҳатчиси бўлиб ишлаган. У 5 январдан Тошкентда иш бошлади.

Таъкидлаш керакки, Италиянинг Тошкентдаги элчихонаси декабрь ойининг ўрталаридан бошлаб қабулхона хизматларини, хусусан, консуллик идораси ва виза бўлимини тўхтатди. Бунинг сабаби «элчихона биносининг фойдаланишга яроқлилиги билан боғлиқ форс-мажор ҳолатлари» сифатида келтирилган. Қабулхона хизматларининг қайта тикланиш санаси кейинроқ эълон қилинади.