Lactalis болалар озиқ-овқатини 18 давлатда, жумладан Ўзбекистонда ҳам қайтариб олмоқда
Франциянинг йирик сут маҳсулотлари ишлаб чиқарувчиси Lactalis компанияси айрим партияларда хавфли токсин аниқланиши мумкинлиги сабабли болалар учун мўлжалланган сут қотиқларини 18 давлатда муомаладан қайтаришга қарор қилди. Чақириб олиш рўйхатига Ўзбекистон ҳам киритилган.
Компания 2026 йил 21 январь куни тарқатган маълумотга кўра, Picot бренди остида ишлаб чиқарилган чақалоқлар сут қотиқларининг олти партияси ихтиёрий равишда бозордан олинади. Текширувлар давомида маҳсулот таркибида бактериялар келиб чиқишли церулид моддаси бўлиши мумкинлиги аниқланган. У ич кетиши ва қусиш каби саломатликка хавфли ҳолатларни келтириб чиқариши мумкин.
Lactalis’нинг таъкидлашича, токсин хомашё етказиб берувчилардан биридан олинган ингредиентда аниқланган. Бироқ компания мазкур етказиб берувчининг номини ошкор қилмаган. Шу билан бирга, бошқа партиялар хавфсиз экани қайд этилган.
Маълумотларга кўра, ҳозирга қадар маҳсулот истеъмоли билан боғлиқ шикоят ёки салбий ҳолатлар қайд этилмаган. Франция расмий органлари ҳам ҳеч қандай даъво тушмаганини маълум қилган.
Сўнгги ойларда болалар озиқ-овқатлари бозорида чақириб олиш ҳолатлари кўпайди. Жорий йил бошидан буён Nestlé компанияси ҳам чақалоқлар учун сут қотиқларини эҳтиёт чораси сифатида муомаладан чиқарган.