Ўзбекистон ва Беларусь стратегик шериклик муносабатларини ўрнатди
«Бу — тарихий қадам. Ҳужжат тенг ҳуқуқлилик, ўзаро ҳурмат, ишонч ва бир-бирининг манфаатларини ҳисобга олиш принципларига асосланган икки томонлама муносабатларнинг юқори даражасини расман мустаҳкамлайди», — деб баёнот берди Александр Лукашенко.
Ҳужжат саноат, қишлоқ хўжалиги, транспорт логистикаси ва ҳудудлараро ҳамкорликни чуқурлаштиришга қаратилган.
Президентлар музокаралари якунида ҳужжатлар пакети имзоланди. Улар орасида Беларусь ва Ўзбекистон ўртасида 2026−2030 йилларга мўлжалланган савдо-иқтисодий ҳамкорликни ривожлантириш бўйича «йўл харитаси» ҳам бор.
Шавкат Мирзиёевнинг Беларусга расмий ташрифи 8−9 июль кунлари бўлиб ўтмоқда. Музокаралар арафасида Минскда икки мамлакат ҳудудлари ва бизнес вакиллари иштирокида Беларусь ва Ўзбекистон ҳудудларининг III форуми ҳам ўтказилди.
7 июль куни Шавкат Мирзиёев ва Грузия бош вазири Ираклий Кобахидзе Тбилисидаги музокаралар якунида ҳам Стратегик шериклик муносабатларини ўрнатиш тўғрисидаги декларацияни имзолаганди.
2025 йилда Франция, Венгрия ва Словакия ҳам Ўзбекистон билан стратегик шериклик муносабатларини ўрнатган эди. Ўша йилнинг апрель ойида Марказий Осиё мамлакатлари ва Европа Иттифоқи етакчилари томонлар ўртасидаги муносабатларни стратегик шериклик даражасига кўтарувчи қўшма декларацияни қабул қилди.
Стратегик шериклик одатда давлатлар ўртасидаги узоқ муддатли ҳамкорликни англатади ва сиёсат, хавфсизлик ҳамда иқтисодиётдан тортиб, маданият, таълим ва гуманитар алоқаларгача бўлган кенг қамровли йўналишларни ўз ичига олиши мумкин. Gazeta аввалроқ Ўзбекистоннинг стратегик ҳамкорлари ҳақида ҳикоя қилганди.