“Бу ҳақиқий уруш бўлади” — Бектемир Мелиқўзиев чемпионлик жанги ҳақида
“Бек Bully” (17-1, 11 та нокаут) айни пайтда WBA чемпионлик камари учун мажбурий даъвогар ҳисобланади. Бироқ у Мунгуя (46-2, 35 та нокаут) қарши чемпионлик жангини ўтказиш имкониятини ҳали қўлга кирита олмаяпти. Хайме 2026 йилнинг май ойида Армандо Ресендисни ҳакамларнинг якдил қарори билан мағлуб этиб, WBA Супер чемпионлик камарини қўлга киритганди.
Мелиқўзиевнинг таъкидлашича, у WBA рейтингида мажбурий даъвогар мақомини рингдаги натижалари орқали қўлга киритган. Шу сабабли чемпионлик жанги навбати айнан унга тегишли бўлиши керак.
“WBA нега ўз қоидаларига амал қилмаётганини тушунмаяпман. Расмий мажбурий даъвогар бор ва чемпион камарини айнан шу боксчига қарши ҳимоя қилиши керак”, деди Мелиқўзиев.
Ўзбекистонлик боксчи Хайме Мунгуяга аввал бошқа рақиб билан жанг қилиш имкониятини беришга тайёрлигини, бироқ ундан кейин чемпионлик жанги ўзиники бўлиши кераклигини айтди.
“Биз ҳар доим қоидаларга амал қиламиз. Рейтингда ҳам айнан шу қоидалар асосида юқорилаб борамиз. Аммо ниҳоят ўзимиз ишлаб топган имкониятни олиш вақти келганда, қоидаларга амал қилинмаяпти”.
Мелиқўзиев мажбурий даъвогар мақомини рингдаги ғалабалари орқали қўлга киритганини алоҳида таъкидлади:
“Мен бу позицияни рингда қўлга киритдим. Бу жанг менга кафолатланган эди. WBA ҳам, Golden Бой ҳам менга бу имконият берилишини билдирган”.
Бектемирнинг фикрича, айни пайтда Хайме Мунгуя билан жанг супер ўрта вазн тоифасидаги энг қизиқарли тўқнашувлардан бири бўлиши мумкин.
“У жанг қилишни яхши кўради, мен ҳам жанг қилишни яхши кўраман. Бу ҳақиқий уруш бўлади”, дея таъкидлади боксчи.
Мелиқўзиев жангни 31 октябрь куни Саудия Арабистонида Канело Алварес ва Кристиан Мбилли ўртасидаги жанг оқшомида ўтказишни ҳам таклиф қилган.
Ўзбекистонлик боксчи Мунгуяни мағлуб эта олишига ишонишини яширмади.
“У ажойиб боксчи. Доимо олдинга интилади ва рингга чиққанида ҳақиқий жанг қилади. Аммо мен ҳам худди шундайман. Уни мағлуб этиш учун менда барча имкониятлар борлигига ишонаман”.
Мелиқўзиевнинг сўнгги жанги февраль ойида бўлиб ўтган. У ўша жангда Сена Агбекони еттинчи раундда нокаутга учратган.
Ҳозир эса Бектемир навбатдаги жангини ўтказмай, мажбурий даъвогарлик мақомини кутмоқда. Унинг фикрича, бошқа жангда таваккал қилиб, мағлубиятга учраш ва шу орқали чемпионлик имкониятини хавф остига қўйиш мантиқсиз.
“Мен бошқа барча боксчиларни ҳурмат қиламан. Аммо ҳозир менинг вақтим. Бу менинг имкониятим. Мен бунга эришдим”, дея фикрини якунлади Мелиқўзиев.
Маълумот учун, 30 ёшли Бектемир Мелиқўзиев профессионал боксда 18 та жанг ўтказиб, уларнинг 17 та ғалаба қозонган. 1 марта мағлубиятга учраган ва 11 та жангни муддатидан аввал якунлаган. У WBA супер ўрта вазн тоифасида чемпионлик учун асосий даъвогарлардан бири ҳисобланади.
Манба: daryo.uz