Президент Андижонда гастрономик кўча ва йўл ўтказгични кўздан кечирди

Президент Шавкат Мирзиёев 23 сентябрь куни кечқурун Андижонда ташкил этилган гастрономик кўча билан танишди.

Узунлиги 1,2 километр бўлган лойиҳа Машраб ва Сариқуй кўчаларини қамраб олган. Унинг умумий қиймати 18 миллиард сўмни ташкил этиб, шундан 8 миллиард сўми республика бюджети, 10 миллиард сўми эса тадбиркорлар маблағлари ҳисобидан молиялаштирилган.

Бу ерда кенг пиёдалар йўлаклари барпо этилган, замонавий ландшафт дизайни яратилган, фавворалар ва ёритиш воситалари ўрнатилган.

Ҳозирда кўчада 35 та савдо объекти жойлашган бўлиб, уларнинг айримлари кечаю кундуз фаолият юритишга мўлжалланган. Кўча кунига 10 мингдан ортиқ аҳоли ва сайёҳни қабул қилиш имкониятига эга.

Давлат раҳбари кўча бўйлаб сайр қилиб, аҳоли ва тадбиркорлар билан мулоқот қилди.

Ўтган ҳафта Шавкат Мирзиёев Нукусда ҳам бўлиб, у ерда ободонлаштирилган кўчани кўздан кечирган эди.

Шу куни президент Андижон вокзали яқинидаги янги йўл ўтказгични ҳам кўздан кечирди. Иншоот Бобуршоҳ кўчасининг икки қисмини ўзаро боғлади.

Қиймати 271 миллиард сўм бўлган йўл ўтказгичнинг умумий узунлиги 796 метрни (эстакада қисми 596 метр), кенглиги эса 26 метрни ташкил этади.

Маълум қилинишича, йўл ўтказгич қурилиши натижасида беморларни шошилинч тиббий ёрдам марказига етказиш вақти 14 дақиқага қисқарган. Марказгача бўлган масофа эса 15 километрдан 9,3 километрга камайган.