Қозоғистонда россиялик рэпер Navai гиёҳванд моддалар контрабандаси иши бўйича ушланди
Россиялик хонанда Наваи Бакиров, Navai тахаллуси билан танилган ижрочи, Қозоғистон ва Қирғизистон чегарасидаги «Кордай» назорат-ўтказиш пунктида ушланган. Автомобилдан дастлабки маълумотларга кўра, марихуана бўлиши мумкин бўлган 2,5 грамм модда топилган. Бу ҳақда Қозоғистон ОАВлари ҳуқуқни муҳофаза қилувчи органларга таяниб хабар берди.
Маълумотларга кўра, хизмат ити хонанда бошқарувида бўлган Mercedes автомобилига реакция билдирган. Текширув вақтида майдалаш қурилмаси ва қўлбола сигарет тайёрлаш учун қоғоз ҳам аниқланган.
Бакиров билан бирга автомобилда яна икки киши бўлган. Учаласи ҳам полицияга топширилган. Ҳодиса юзасидан гиёҳвандлик воситалари контрабандаси ва уларни сотиш мақсадисиз ноқонуний муомала қилишга оид моддалар бўйича жиноят иши қўзғатилган.
Айни пайтда топилган модданинг аниқ таркиби ҳали белгиланмаган. ОАВ хабарларига кўра, сафар иштирокчиларининг ҳаракатларига якуний ҳуқуқий баҳо ҳам ҳозирча берилмаган.
Navai’нинг 14 октябрь куни Остонада концерти режалаштирилган эди. Ташкилотчилар тадбир техник сабабларга кўра бекор қилинганини маълум қилган.
Шунингдек, ОАВларда Бакировнинг гиёҳвандлик моддалари таъсири остида автомобиль бошқаргани учун маъмурий жавобгарликка тортилиши мумкинлиги ҳақида хабарлар тарқалди. RuSamara нашри Mash Telegram-каналига таяниб, хонанданинг сийдик таҳлилида каннабиноидлар аниқланганини ёзган.
Қозоғистон Маъмурий ҳуқуқбузарликлар тўғрисидаги кодексининг 608-моддаси 1-қисмига кўра, бундай қоидабузарлик учун 15 сутка маъмурий қамоқ ва етти йил муддатга ҳайдовчилик ҳуқуқидан маҳрум қилиш жазоси назарда тутилган. Бироқ ҳозирча ушбу модда Бакировга нисбатан қўллангани расман тасдиқланмаган.