Ўзбекистон ва Туркия мактаб ҳамда университетлари ўртасида тажриба алмашиш кенгайтирилади
Ўзбекистон Президенти Администрацияси раҳбари Саида Мирзиёева ва Нежмеддин Билол Эрдўғон икки мамлакат таълим муассасалари ўртасидаги ҳамкорликни кенгайтиришга келишиб олди. Ҳамкорлик доирасида тажриба алмашиш, ўқувчилар, талабалар ва ўқитувчилар учун янги имкониятлар яратиш масалалари кўзда тутилган.
Саида Мирзиёева ва Нежмеддин Билол Эрдўғон Истанбулдаги Ибн Халдун университети ҳамда Yenidogu мактабига ташриф буюрди. Саида Мирзиёева мазкур таълим муассасаларидаги ўқитиш ёндашувлари, жумладан, ёшларнинг қобилиятларини ривожлантириш ва мустақил фикрлашини шакллантириш усуллари билан танишди.
Мирзиёеванинг таъкидлашича, ушбу тажриба ҳамкорликда ишлаш учун янги имкониятлар очади. Таълим соҳасидаги ҳамкорлик Ўзбекистон ва Туркия ўртасидаги алоқаларни мустаҳкамлашга ҳам хизмат қилади.