Шахмат: бугун Нодирбек Абдусатторов Уэсли Со билан куч синашади

АҚШнинг Сент-Луис шаҳрида давом этаётган «Sinquefield Cup — 2024» турнирининг ортда қолган 6-тур ўйинларидан кейин франциялик Алиреза Фирузжа 4 очко билан етакчиликни мустаҳкамлаб олган бўлса, Нодирбек Абдусатторов 2,5 очко билан 8-ўринга кўтарилишга муваффақ бўлди.

Кеча кечки пайти «Grand Chess Tour» мусобақасининг бешинчи босқичи ҳисобланган мазкур турнирнинг 6-турида Нодирбек Абдусатторов қора доналарда нидерландиялик Аниш Гирига қарши дона сурди. Тенг курашлар остида ўтган учрашувнинг 56-юриш ҳолатида томонлар дурангга имзо чекди.

Ян Непомняший – Фабиано Каруана 0:1;

Дин Лижэнь – Рамешбабу Прагнанандха 0,5:0,5;

Уэсли Со – Алиреза Фирузжа 0,5:0,5;

Доммараджу Гукеш – Максим Вашье Лаграв 0,5:0,5 ҳисоблари қайд этилди.

Бугун, 26 август куни нуфузли мусобақанинг 7-турида ҳамюртимиз Нодирбек Абдусатторов оқ доналарда америкалик Уэсли Сога қарши ҳаракатланса, қолган доскаларда Максим Вашье Лаграв – Аниш Гири, Рамешбабу Прагнанандха – Ян Непомняший, Алиреза Фирузжа –Дин Лижэнь, Фабиано Каруана – Доммараджу Гукеш ўйинлари бўлиб ўтади.

«Sinquefield Cup — 2024» турнирининг сўнгги тур ўйинлари 29 август куни ташкил этилади.