Ижтимоий карта: у кимга қўйилган ва у орқали қандай тўловларни олиш мумкин
Ижтимоий ҳимоя миллий агентлиги ижтимоий картага қандай ариза бериш, унинг қандай функцияларни бажариши ва уни кимлар бепул олиши мумкинлиги ҳақида маълумот берди.
Ижтимоий ҳимоя миллий агентлиги картани қандай олиш мумкинлиги, кимларга бепул берилиши ва қандай функцияларни бажариши ҳақида маълумот берди.
Ижтимоий карта бериш учун ариза
Тажриба-синов босқичида ижтимоий картани очиш учун электрон аризалар «Инсон» ижтимоий хизматлар марказлари орқали қабул қилинади. Эндиликда фуқаролар Ягона интерактив давлат хизматлари портали, «Ижтимоий карта» мобил иловаси ҳамда «Халқ банки» АТБ, «Алоқабанк» АТБ орқали ариза топширишлари мумкин бўлади.
Ижтимоий карта ариза берилган пайтдан бошлаб 3 иш куни мобайнида берилади. Айрим парваришга муҳтож фуқаролар учун «Инсон» ижтимоий хизматлар марказлари 15 кун ичида уларнинг яшаш жойига карталарни етказиб беради.
Ижтимоий карта қуйидаги тоифадаги фуқароларга бепул берилади:
• «Ижтимоий ҳимоя ягона реестри» ахборот тизими орқали кам таъминланган деб эътироф этилган кам таъминланган оилалар реестрига киритилган оилаларга (шахсларга);
• кўп болали оилалар аъзоларига;
• ногиронлиги бўлган шахсларга;
• ёлғиз яшайдиган қариялар ва парваришга муҳтож ногиронлиги бўлган шахсларга;
• парваришга муҳтож бўлган шахсларни парвариш қилаётган шахсларга;
• етим ва ота-она қарамоғидан маҳрум бўлган болаларга;
• васийлар (ҳомийлар), тутинган ота-оналарга;
• муомалага лаёқатсиз деб топилган, муомала лаёқати чекланган шахсларга, муомалага лаёқатсиз ва муомала лаёқати чекланган шахсларнинг қонуний вакилларига;
• пенсионерларга;
• Давлат бюджети маблағлари ҳисобидан стипендия олувчи талабалар (тингловчилар);
• шаҳар йўловчи транспортидан бепул фойдаланиш ҳуқуқига эга бўлган шахсларга (таксидан ташқари).
Ижтимоий карта орқали тўловларни амалга ошириш
2024 йил декабрь ойидан бошлаб ижтимоий карта орқали қуйидаги тўловлар амалга оширилади: кам таъминланган оилалар болалари учун нафақа, кам таъминланган оилаларга моддий ёрдам, ёшга доир ва ногиронлик бўйича нафақа, ёлғиз кексалар ва ногиронлиги бўлган шахсларга ойлик моддий ёрдам, 18 ёшгача бўлган болалар учун ногиронлик нафақаси, ногиронлиги бўлган болаларни парвариш қилаётган оналар учун нафақа, протез-ортопедия буюмлари ва реабилитация техник воситаларини сотиб олиш учун ваучерлар, боқувчисини йўқотганлик нафақаси.
1 апрелдан бошлаб Тошкент шаҳри ва Янгийўл туманида ижтимоий карта орқали яна 2 турдаги ижтимоий тўловлар: ҳомиладорлик ва туғиш нафақаси, шунингдек, «Саховат ва кўмак» жамғармаси, «Аёллар» ва «Ёшлар» дафтарларидан бир марталик моддий ёрдам қўшимча равишда тўланади.
Ижтимоий карта функциясини босқичма-босқич кенгайтириш
1 апрелдан бошлаб у транспорт картаси ва имтиёзли транспорт картаси функциясини бажаради. Бу шуни англатадики, жамоат транспортида имтиёзли ёки бепул юриш ҳуқуқига эга бўлган шахслар ушбу ҳуқуқдан фойдаланишлари мумкин, имтиёзга эга бўлмаган шахслар эса йўлкира ҳақини умумий қабул қилинган тарифлар бўйича тўлашлари мумкин бўлади.
Эслатиб ўтамиз, «Ижтимоий харита» ахборот тизими президент қарорига асосан 2024 йил июль ойида жорий этилган эди. Харита ижтимоий тўловлар ва субсидиялар, ижтимоий хизматлар ва ёрдамларни тайинлаш, тақдим этиш, мониторинг қилиш ва баҳолаш жараёнларини тўлиқ автоматлаштириш имконини беради.