Ўзбекистоннинг Словакиядаги биринчи элчиси тайинланди

Ўзбекистоннинг Австрия ва Албаниядаги элчиси Бахтиёр Ибрагимов мамлакатнинг Словакиядаги (қароргоҳи Вена шаҳрида)даги биринчи элчиси бўлди. У Словакия президенти Петер Пеллегринига ишонч ёрлиқларини топширди, дея хабар бермоқда «Дунё» ахборот агентлиги.

Братиславадаги Грассалковичлар саройида бўлиб ўтган суҳбатда Ўзбекистон ва Словакия ўртасидаги муносабатларнинг ҳозирги ҳолати, уларни ривожлантириш истиқболлари муҳокама қилинди.

Томонлар 2025 йилда сиёсий, савдо-иқтисодий ва маданий-гуманитар соҳаларда қўшма муҳим тадбирлар ўтказиш режалаштирилганини таъкидлади.

Бахтиёр Ибрагимов Ўзбекистоннинг БМТдаги собиқ доимий вакили (2017−2023). У 2023 йил октябрь ойида Ўзбекистоннинг Австриядаги элчиси лавозимида иш бошлаган. Шу билан бирга, у ЕХҲТ, БМТ Гиёҳванд моддалар ва жиноятчиликка қарши курашиш бошқармаси каби халқаро ташкилотлардаги Ўзбекистон расмий вакили сифатида ҳам аккредитация қилинган. Шу йилнинг январь ойида Ибрагимов қўшимча равишда Ўзбекистоннинг Албаниядаги биринчи элчиси бўлганди.