Адлия вазири ўринбосари Худоёр Мелиев лавозимидан озод этилди
«Дарё»нинг ёзишича, Худоёр Мелиев туғилган кунида — 24 февраль куни бўшатилган. Унинг истеъфоси бўйича расмий ахборот эълон қилинмаган. Шунингдек, унинг нима сабабдан бўшатилгани ва қайси лавозимга тайинлангани ҳақида ҳам маълумотлар мавжуд эмас.
Худоёр Хуррамович Мелиев 1980 йилда Самарқанд вилоятида туғилган. 2019 йил январь ойидан адлия вазири ўринбосари лавозимида ишлаб келган.
У 2000 йилда Тошкент давлат юридик институтини, 2006 йилда эса ушбу университетнинг магистратура босқичини тамомлаган.
2005−2008 йилларда Адлия вазирлигининг Маъмурий-ижтимоий қонунчилик бошқармаси, 2008−2011 йилларда Иқтисодий қонунчилик бошқармаси, 2011−2017 йилларда Адлия вазирлигининг жамоат, нодавлат нотижорат ва диний ташкилотлар билан ишлаш бошқармаси бошлиғи лавозимларида ишлаган. 2017−2019 йилларда Адлия вазирлиги Қонунчилик бош бошқармасига раҳбарлик қилган.
Эслатиб ўтамиз, аввалроқ президент Шавкат Раҳмоновни ички ишлар вазирининг биринчи ўринбосари — ИИВ Тезкор-қидирув департаменти бошлиғи лавозимидан озод қилганди. Бош вазир у ишдан олиниши олдидан фаолиятини танқид қилган.