Марказий Осиё ва Европа Иттифоқи стратегик шерикларга айланади

Марказий Осиё давлатлари ва Европа Иттифоқи ўзаро муносабатларни стратегик шериклик даражасига олиб чиқмоқчи. Бу икки минтақанинг биринчи саммити якунлари бўйича жума куни қабул қилинадиган Самарқанд декларациясида кўзда тутилган, деди Ўзбекистон президенти матбуот котиби Шерзод Асадов бир кун аввал бўлиб ўтган брифингда.

Унинг «Газета.uz»га берган интервьюсида аниқлик киритишича, ҳужжат лойиҳаси пайшанба куни кечга яқин келишилган.

«Декларация конструктив мулоқотни кенгайтиради ва барча йўналишлардаги ҳамкорликка кучли суръат бағишлайди», — деди Шерзод Асадов.

«Бу, бевосита, Марказий Осиё давлатлари раҳбарлари ва Европа Иттифоқи етакчиларининг йиғилиши. Унда иқтисодий ҳамкорликни мустаҳкамлаш, транспорт соҳасидаги ўзаро боғлиқлик, барқарор тараққиёт ва экология, гуманитар ҳамкорлик каби кенг қамровли масалалар муҳокама қилинади», — деди давлат раҳбари матбуот котиби.

Музокаралар якунида делегациялар раҳбарлари Самарқанд иқлим форумининг ялпи сессиясида иштирок этади. Асосий эътибор экологик таҳдидларга қарши курашиш, бу борадаги халқаро ҳамкорликни мустаҳкамлашга қаратилади.

Саммитнинг асосий тадбирлари олдидан Ўзбекистон президенти Шавкат Мирзиёев Европа кенгаши президенти Антониу Кошта ва Европа комиссияси президенти Урсула фон дер Ляен билан учрашув ўтказди.

Музокараларда асосий эътибор инновациялар, «яшил» энергетика, тоғ-кон тармоғи, қишлоқ хўжалиги, транспорт, логистика, рақамлаштириш ва бошқа йўналишларда қўшма дастур ва кооперация лойиҳаларини илгари суришга қаратилди. Туризм, маданият, фан, таълим ва соғлиқни сақлаш соҳаларидаги фаол алмашинувларни давом эттириш муҳимлиги қайд этилди.

Шерзод Асадовнинг таъкидлашича, Ўзбекистон ва Европа Иттифоқи ўртасидаги товар айирбошлаш ҳажми 6 млрд евродан ошди (2020 йилдан буён 2 баробар ўсди), Ўзбекистон маҳсулотлари экспорти 2020 йилга нисбатан 4 баробар ошди, қўшма корхоналар сони 1 мингдан ошди. Европа компаниялари билан инвестиция лойиҳалари портфели 30 млрд евродан ошади. Ўзбекистон Европа тикланиш ва тараққиёт банкининг асосий бенефициари ҳисобланади. Бундан ташқари, Тошкентда Европа инвестиция банкининг минтақавий офисини таъсис этиш тўғрисида битим имзоланди.

2025 йилда Ўзбекистон ва Европа Иттифоқи ўртасида Кенгайтирилган шериклик ва ҳамкорлик тўғрисидаги битим имзоланиши кутилмоқда.

Шавкат Мирзиёев саммит олдидан Туркманистон, Қирғизистон, Тожикистон ва Қозоғистон президентлари билан икки томонлама учрашувлар ўтказди.