Интернетда "Абдуллоҳ" номи билан танилган "тиктокер" қамоққа олинди

Миллатлар аро низо келтириши мумкин бўлган ҳамда ўзбек халқига нисбатан ҳақоратомуз сўзларни айтгани учун унга нисбатан жиноят иши қўзғатилди.

Тошкент вилояти ИИББ Матбуот хизмати хабарига кўра, ижтимоий тармоқларда Абдуллоҳ тахаллуси билан танилган Тошкент вилоятида яшовчи 26 ёшли шахс 2024 йилнинг октябрь-ноябрь ойларида Кореяда яшаб, ўзининг тармоқдаги саҳифалари орқали миллатлар аро низо келтириши мумкин бўлган ҳамда ўзбек халқига нисбатан ҳақоратомуз сўзларни айтиб, чиқишлар қилган.

Унинг бу сўзлари кўплаб ўзбекистонликларнинг эътирозларига сабаб бўлган. Қайд этилишича, ушбу шахс жорий йилнинг 25 март уни Абу-Даби — Самарқанд йўналиши орқали Ўзбекистон ҳудудига келганда ҳуқуқ-тартибот ходимлари томонидан қўлга олинган. Унга нисбатан «қамоққа олиш» тарздаги эҳтиёт чораси қўлланилган.

«Мен ижтимоий тармоқда халқимизни ҳақорат қилганман. Буни «актив» учун қилгандим. Лекин, буларни тушуниб етиб, пушаймон бўлдим. Барчадан узр сўрайман, илтимос кечиринглар», — дейди қўлга олинган шахс.

Унга нисбатан ЖКнинг тегишли моддалари билан жиноят иши қўзғатилиб, ҳозирда тергов ҳаракатлари олиб борилмоқда.