Туркманистон Халқ маслаҳати раиси Гурбангули Бердимуҳамедов Ўзбекистонга ташриф буюради

Туркманистон Халқ маслаҳати раиси Гурбангули Бердимуҳамедов Ўзбекистон президенти Шавкат Мирзиёевнинг таклифига биноан 23−24 апрель кунлари Самарқандда бўлади, хабар қилди давлат раҳбари матбуот хизмати.

Музокаралар кун тартибидан Ўзбекистон-Туркманистон стратегик шериклик муносабатларини мустаҳкамлаш ва кўп қиррали ҳамкорликни, биринчи навбатда, сиёсий, парламентлараро, савдо-иқтисодий, транспорт-коммуникация ва маданий-гуманитар соҳаларда кенгайтириш масалалари ўрин олган.

Шунингдек, минтақавий ва халқаро кун тартибидаги долзарб масалалар юзасидан фикр алмашилади.

Аввалроқ, 21−22 апрель кунлари Гурбангули Бердимуҳамедов Қозоғистонга ташриф буюрган эди. Туркистонда у Қозоғистон президенти Қосим-Жомарт Тоқаев билан норасмий учрашув ўтказди ва икки томонлама муносабатларнинг барча йўналишлари бўйича мамлакатлар ўртасидаги стратегик шерикликни мустаҳкамлаш истиқболларини муҳокама қилди. Суҳбатдошлар, хусусан, янги ўсиш нуқталарини топиш ва яқин йилларда товар айирбошлаш ҳажмини 1 миллиард долларга етказиш бўйича тизимли чора-тадбирлар кўриш зарурлигини таъкидлади.