Бекзот Мавлонов президент ёрдамчиси бўлди, Азиз Магрупов — маслаҳатчи
Шавкат Мирзиёевнинг тегишли фармонлари билан:
Бекзот Мардонович Мавлонов — президентнинг ёрдамчиси лавозимига тайинланди ва шу муносабат билан президентнинг ҳуқуқий экспертиза ва комплекс таҳлил қилиш масалалари бўйича маслаҳатчиси лавозимидан озод этилди;
Азиз Юлдашевич Магрупов — президентнинг ташқи инвестициялар масалалари бўйича маслаҳатчиси лавозимига тайинланди ва шу муносабат билан президент ёрдамчиси лавозимидан озод этилди.
Эслатиб ўтамиз, Шавкат Мирзиёев фармонига мувофиқ, Президент администрацияси раҳбари лавозими қайта жорий этилди ва бу вазифага Саида Мирзиёева тайинланди. У бугунгача президент ёрдамчиси сифатида фаолият юритган.
Бундан ташқари, Комил Алламжонов Президент администрацияси янги раҳбари Саида Мирзиёеванинг жамоатчилик асосида мустақил маслаҳатчиси бўлди. У сўз эркинлиги, инвестиция ва инновациялар соҳаларида экспертлик ёрдами кўрсатади. У 2024 йил сентябрида ПА Ахборот сиёсати департаменти раҳбарлигидан кетганди.