Қатор давлатларда мигрантларни қуролли ҳаракатларга ёллаш кўпаймоқда — Ўзбекистон Миграция агентлиги
«Қатор давлатларда меҳнат мигрантларини қуролли ҳаракатларда иштирок этишга ёллаш ҳолатлари кўпаймоқда. Бу сизнинг ҳаётингизга, эркинлигингизга ва келажагингизга хавф солади», — дейди идора.
Агентлик қуйидагилар қатъий равишда тақиқланишини эслатиб ўтди:
- қуролли можаро ва жанговар ҳаракатлар олиб борилаётган ҳудудларга яқинлашиш;
- ҳарбий операцияларда иштирок этиш;
- хорижий давлатларнинг қуролли кучлари, хавфсизлик хизматлари, ҳарбий адлияси ёки бошқа куч тузилмалари сафига қўшилиш;
- шубҳали шахслар, гуруҳлар ёки ташкилотлар томонидан амалга оширилаётган ёллаш ёки жалб қилиш (вербовка) таклифларига розилик бериш.
Ўзбекистон Жиноят кодексининг 154¹-моддасига мувофиқ, Ўзбекистон фуқаросининг чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириши БҲМ (ҳозирда 412 000 сўм)нинг 300 бараваригача миқдорда жарима ёки 3 йилгача ахлоқ тузатиш ишлари билан жазоланади. Хорижий давлатларда ёлланма асосда ҳарбий хизмат ўташ эса 3 йилдан 5 йилгача озодликдан маҳрум этишга олиб келади.
Хавф туғилганда нима қилиш керак?
«Шубҳали таклиф ёки вазиятлар юзага келганда, дарҳол Ўзбекистоннинг дипломатик ваколатхоналари ва консуллик муассасалари (рўйхат) ёки Миграция агентликнинг ваколатхоналарига мурожаат қилинг. Ҳаётингиз ва эркинлигингизни асранг. Фақат қонун доирасида ҳаракат қилинг!» — дея огоҳлантирди агентлик.
Ўзбекистон фуқароларининг урушга ёлланиши
Яқинда «Хочу жить» (Яшашни истайман) лойиҳаси Украинада 33 та давлат фуқаролари ҳарбий асирликда сақланаётгани, уларнинг энг кўпи Ўзбекистондан экани ёзди. Шунингдек, 2025 йилда Россия камида 902 нафар ўзбекистонликни урушга ёллагани айтилмоқда.
«Биз апрель ойида Ўзбекистондан келган ёлланма аскарлар рўйхати (1110 нафар)ни эълон қилганимиздан сўнг мамлакатда фуқароларнинг жанговар ҳаракатларда иштироки ҳақидаги маълумотларни текшириш бошлангани, шунингдек, ёлланма аскарларни жиноий таъқиб қилиш кучайганига қарамай, Россия уларни ёллаш бўйича саъй-ҳаракатларни кучайтиришда давом этмоқда», — дея қайд этганди лойиҳа.
2023 йилдан бошлаб Ўзбекистон судлари бундай ишлар бўйича бир қатор қарорлар қабул қилди. Бироқ сўнгги бир йил ичида ёлланиш учун ҳукмлар нисбатан енгилроқ чиқарилмоқда. 2023 йил октябрь ойида 2014−2015 йилларда ўзини мустақил деб эълон қилган ДХР томонида Украинада жанг қилган, Тошкент вилоятида яшаган фуқаро беш йилга озодликдан маҳрум этилган бўлса, 2025 йил январь ойида апелляция инстанцияси ДХРда жанг қилган фуқаро учун олти йиллик асл қамоқ жазосини шартли жазога алмаштирган.
2024 йил ноябрь ойида Украинадаги жанговар ҳаракатларда Россия томонида иштирок этгани учун медаль ва Россия фуқаролиги билан тақдирланган 22 ёшли ўзбекистонлик ҳам беш йиллик қамоқ жазоси ўрнига шартли қамоқ жазосини олди.
2024 йил декабрь ойида Ўзбекистон суди 39 ёшли эркакни Украинадаги урушда Россия томонида иштирок этгани учун 4 йилу 2 ойга озодликни чеклаш жазосига ҳукм қилганди. Судланувчининг таъкидлашича, у жанговар ҳаракатлар давомида 10 дан ортиқ украиналик аскарни ўлдирган.
Gazeta сўнгги бор 2025 йил 12 август куни ёлланиш билан боғлиқ суд ҳукми билан танишиб чиқди. Унга кўра, 4 август куни жиноят ишлари бўйича Каттақўрғон шаҳри судида Россия томонидан Украинага қарши урушда қатнашган Ўзбекистон фуқаросига нисбатан суд ҳукми ўқилган ва унинг озодлигини 4 йилга чекланган. 25 ёшли йигит Россияда бўлган вақти наркотик билан боғлиқ жиноятда айбланиб, озодликдан маҳрум қилинган. Кейинроқ фронтга бориш эвазида озод қилинган. Урушда яраланган йигит, госпиталда даволаниб, ватанга қайтган.