Нодир Ғаниев Ўзбекистоннинг Монакодаги биринчи элчиси бўлди

Ўзбекистоннинг Монако князлигига тайинланган биринчи фавқулодда ва мухтор элчиси (қароргоҳи Париж шаҳрида жойлашган) Нодир Ғаниев князь Альберт II га ишонч ёрлиқларини топширди, дея хабар қилмоқда «Дунё» ахборот агентлиги.

Монако князи Ўзбекистонда қайта тикланадиган энергетика бўйича йирик лойиҳаларни ривожлантиришдан манфаатдор эканини билдирди, октябрь-ноябрь ойларида Самарқанд шаҳри ЮНЕСКО Бош конференциясининг 43-сессиясига мезбонлик қилиши билан самимий табриклади.

Ўзбекистон элчиси, ўз навбатида, Ўзбекистон — Монако муносабатларини янада ривожлантириш учун барча саъй-ҳаракатларини амалга оширишини билдирди.

Эслатиб ўтамиз, Ўзбекистон ва Монако ўртасидаги дипломатик муносабатлар 2013 йил 29 ноябрда ўрнатилган. Ватикандан кейин дунёдаги иккинчи энг кичик давлат бўлган Монако Ғарбий Европада, Франциянинг Ривьера қисмида, Жер денгизи бўйида жойлашган.

Нодир Ғаниев Ўзбекистоннинг Франциядаги элчиси этиб тайинланган ва 2024 йил сентябрь ойида президент Эммануэл Макронга ишонч ёрлиқларини топширган. Дипломат шу йилнинг май ойидан буён мамлакатнинг Португалиядаги элчиси лавозимида ҳам ишлаб келмоқда.