Бухорода 20 яшар қиз 20 нафардан ортиқ эркакка ОИТС юқтирди

Суд ўзининг ОИТСга чалинганини била туриб, эркаклар билан жинсий алоқада бўлган қизга жазо тайинлади.

Жиноят ишлари бўйича Ғиждувон туман судининг маълумотига кўра, 2002 йилда Ғиждувон туманида туғилган М.Р. тунги клублардан бирида ишлаб, бўш вақтларида фоҳишалик билан шуғулланган.

Пала-партиш ҳаёт кечирган қиз соғлиғидан шикоят қилиб, туман касалхонасига борганида унда ОИТС касаллиги мавжудлиги аниқланган.

М.Р. шу заҳотиёқ рўйхатга олинган ва мажбуриятлари ҳақида тушунтирилган. У ўзидаги инфекцияни бошқаларга юқтирса, Жиноят кодексининг тегишли моддаси билан жавобгарликка тортилиши ҳақида огоҳлантирилган.

Аммо, у пул эвазига эркаклар билан жинсий алоқага киришиб, шерикларидан касаллигини яшириб келган. Олиб борилган тергов-суриштирув ҳаракатлари давомида М.Р. 20 нафардан ортиқ эркакка ОИТС касаллигини қасддан юқтиргани аниқланган.

Айбдор пул ишлаш учун ўз касаллигини бошқаларга қасддан юқтирганини тан олган.

Жиноят кодексининг 113-моддаси (Таносил ёки ОИВ касаллиги/ОИТСни тарқатиш) 4-қисми билан айбланди.