Аъзам Абдуллаев «Ўзкомназорат» бошлиғи вазифасини бажарувчи этиб тайинланди

Ҳукумат қарори билан Аъзам Абдуллаев Ахборотлаштириш ва телекоммуникация соҳасида назорат бўйича давлат инспекцияси («Ўзкомназорат») бошлиғи вазифасини бажарувчи этиб тайинланди. «Ўзкомназорат»нинг аввалги раҳбари айрим ижтимоий тармоқлар блокланиши ортидан лавозимидан четлаштирилган эди.

Аъзам Абдуллаев Абдушукурович Ахборотлаштириш ва телекоммуникация соҳасида назорат бўйича давлат инспекцияси («Ўзкомназорат») бошлиғи вазифасини бажарувчи этиб тайинланди. Бу ҳақда Адлия вазирлиги хабар қилди.

Тайинлов ҳукуматнинг 27 апрелдаги қарори [216-сонли] билан амалга оширилди.

Аъзам Абдуллаев Telegram, YouTube, Instagram, Facebook, Odnoklassniki`нинг Ўзбекистондаги фаолияти чекланиши ортидан лавозимидан озод қилинган Ғолибшер Зияев ўрнига тайинланди.

Тайинловга қадар у «Тошшаҳартрансхизмат» АЖда раҳбар ўринбосари лавозимида ишлаб келаётган эди.