«Ўқиши учун уринг». Хатирчи тумани ҳокими мактаб ўқувчилари билан ишлаш ҳақида

Навоий вилояти Хатирчи тумани ҳокими Сайфиддин Низомов мактаб ўқувчиларини керак бўлса уриш мумкинлигини айтди. Унинг сўзларига кўра, «аввал ўқитувчилар болаларни калтаклашган ва бу уни ҳозиргача келишига ёрдам берган». Туман ҳокимлиги матбуот хизмати «ижтимоий тармоқларда вазият бошқача талқин қилинганини» маълум қилди.

Интернетда Навоий вилояти Хатирчи тумани ҳокими Саифиддин Низомов мактаб ўқитувчилари ўқувчиларга нисбатан қаттиққўл бўлиши, керак бўлса уларни калтаклаши мумкинлигини айтган аудиоёзув тарқалди.

«Биз компьютерларни тўғрилаймиз… Китоблар етишмайдими? Етишадми? Билим берадиган ўқитувчилар талабчан бўлиши керак. Топшириқ қани, конспект қани, деб сўрашлари керак. Ўқитувчида нутқ, билим, талаб бўлиши керак. Уй вазифасини бажармаганлиги учун ўқувчига ҳамманинг олдида танбеҳ бериш керак. Ўшандагина ўзгаришлар бўлади», — деди ҳоким.

«Биз ўқувчилик чоғимизда қандай калтаклар еб катта бўлганмиз? Шу ўқитувчининг „калтаги“ бизни ҳозирги кунгача олиб келган. Ўша ўқитувчини жуда ҳурмат қиламан. Бир-иккитасини уринг. Ҳеч нарса қилмайди. Бир-икки шапалоқ ҳеч нарса қилмайди. Ўргансин, ўқисин, мажбурлаш керак… Мендан „нормальний“ ўқитувчи чиқади. Агар мен ўқитувчи бўлганимда, худди шундай дарс берган бўлардим. Менга ўхшаб талаб қилинг», — деган Сайфиддин Низомов.

Ҳокимиятнинг муносабати

Хатирчи тумани ҳокимлиги матбуот хизмати хабарида ушбу туман мактаб битирувчилари олий таълим муассасаларига кириш бўйича етакчилардан бири эканлигини маълум қилди.

«Газета.uz»да реклама

«Юртимиздаги кўпгина олийгоҳларда хатирчилик талабаларнинг борлиги бизни хурсанд қилади, — дея таъкидлади ҳокимлик. — Бундай пешқадамликни қўлдан бермаслик учун туман ҳокими ва тегишли масъулларҳар ҳар куни таълим муассасаларига ташриф буюришни анъанага айлантирган».

«Яқинда туман ҳокими ва тегишли масъуллар, тумандаги таълим сифати паст бўлган мактаб раҳбарлари билан ўзаро суҳбат жараёнида ўқувчиларни бўш вақтларини мазмунли ўтказиш, уларни билим олишга қизиқтириш, тўгаракларга жалб қилиш, лозим бўлса, қатъий тартиб-интизом билан ёш авлодга таълим-тарбия бериш бўйича тавсиялар берилган», — дея қайд этди ҳокимлик матбуот хизмати.

Ҳокимлик «ижтимоий тармоқларда бу ҳолат бошқача талқин қилинган», деб ҳисоблайди.

«Бундай ҳолатларнинг олдини олиш бўйича таълим муассасалари билан ҳамкорликда тегишли ишлар амалга оширилади», — дея маълум қилди ҳокимлик. Бироқ қайси ҳолатларнинг олди олинаётганига аниқлик киритилмаган.