Тошкент вилоятида жамоат транспорти учун янги тарифлар тасдиқланди

Тошкент вилояти шаҳарларида жамоат транспорти учун янги тариф тизими жорий этилади. Тегишли қарор вилоят халқ депутатлари Кенгаши томонидан тасдиқланди.

Янги тартибга кўра, транспорт ёки банк картаси орқали тўлов қилинганда бир мартаги йўл ҳақи 2 минг сўмни, нақд пулда тўланганда эса 2,6 минг сўмни ташкил этади. Худди шу миқдордаги тўлов бир дона юкни ташиш учун ҳам белгиланган.

Шунингдек, йўловчилар учун янги турдаги йўл чипталари жорий этилади. Улар қаторига 1, 7, 90, 180 ва 365 кунлик чекланмаган сафарлар учун абонементлар, шунингдек 5, 10, 15, 20 ва 30 кун давомида маълум миқдордаги сафарлардан фойдаланиш имконини берувчи тарифлар киради.

Масалан, 130 та сафар учун мўлжалланган бир ойлик абонемент нархи 200 минг сўм этиб белгиланган. Бу ҳар бир сафар учун алоҳида тўлов қилишга нисбатан арзонроқ бўлиб, бундай ҳолда умумий харажат 260 минг сўмни ташкил этади.

Қарорга мувофиқ, пенсионерлар, ногиронлиги бўлган шахслар, талабалар ва ўқувчилар учун имтиёзли тарифлар ҳам жорий этилмоқда. Улар учун бир кунлик чекланмаган сафарлар абонементи нархи одатий 8 минг сўм ўрнига 4 минг сўм қилиб белгиланган.

Бундан ташқари, транспорт картаси эгалари йўналиш алмаштиришда махсус тариф тизимидан фойдаланиш имкониятига эга бўлади. Янги тартиб нақд пулсиз тўловларни кенгайтириш ва жамоат транспортидан фойдаланишни янада қулайлаштиришга қаратилган.