«Жалолиддин Мангуберди» электропоездининг иккинчи таркиби Тошкент-Хива йўналишида қатновни бошлайди

22 июлдан бошлаб «Жалолиддин Мангуберди» номли юқори тезликдаги электропоезднинг иккинчи таркиби Тошкент–Хива–Тошкент йўналишида мунтазам қатновни йўлга қўяди. Бу ҳақда «Ўзбекистон темир йўллари» акциядорлик жамияти ахборот хизмати маълум қилди.

Маълум қилинишича, поезд Тошкентдан душанба, чоршанба ва жума кунлари йўлга чиқади. Хивадан эса сешанба, пайшанба ва шанба кунлари қатнайди.

Поезд Тошкент Марказий темир йўл вокзалидан соат 07:00 да, Хива вокзалидан эса соат 07:15 да жўнайди. Йўналиш бўйича сафар вақти 7 соат 36 дақиқани ташкил этади.

Эслатиб ўтамиз, 2023 йил 10 октябрда қабул қилинган Президентнинг ПҚ–329-сон қарорига мувофиқ, Корея Эксимбанки ҳамкорлигида Ўзбекистон учун олтита юқори тезликда ҳаракатланувчи «Hyundai Rotem» электропоезди харид қилиниши белгиланган.

Ҳозирги кунга қадар ушбу лойиҳа доирасида учта электропоезд мамлакатга олиб келинган. Биринчи таркиб 2026 йил 5 майдан буён Тошкент–Хива–Тошкент йўналишида йўловчиларга хизмат кўрсатмоқда.

22 июлдан эса иккинчи поезд таркибининг ишга туширилиши мазкур йўналишдаги қатновлар имкониятларини янада кенгайтиши ва йўловчиларга қулайлик яратиши кутилмоқда.