Шавкат Мирзиёев Дональд Трамп билан телефон орқали гаплашди

7 август куни Шавкат Мирзиёев АҚШ президенти Дональд Трамп билан телефон орқали мулоқот қилди. Бу ҳақда Ўзбекистон президенти матбуот хизмати хабар қилди.

Суҳбат аввалида давлат раҳбари Дональд Трампни АҚШ мустақиллигининг 250 йиллиги муносабати билан яна бир бор табриклади.

Дональд Трамп эса Ўзбекистон ва АҚШ ўртасидаги муносабатлар «мисли кўрилмаган даражага етганини, икки мамлакат етакчилари ўртасида ўзаро ишончга асосланган яқин мулоқот шаклланганини» таъкидлади.

Томонлар олий даражада эришилган келишувларнинг изчил амалга оширилаётганини қайд этиб, стратегик шериклик муносабатларини янада ривожлантириш истиқболларини кўриб чиқди.

Суҳбатда уч йиллик иқтисодий ҳамкорлик дастурининг амалга оширилиши, Америка-Ўзбекистон Ишбилармонлик ва инвестиция кенгашининг биринчи йиғилиши, ҳудудлар ва Америка штатлари ўртасидаги алоқалар кенгайиб бораётгани ҳам муҳокама қилинди. Шунингдек, АҚШ фуқаролари учун визасиз тартиб жорий этилгани ишбилармонлик алоқаларининг фаоллашувига хизмат қилаётгани таъкидланди.

Фуқаро авиацияси, автомобилсозлик, тоғ-кон саноати, инфратузилма, энергетика, металлургия, сунъий интеллект, рақамли технологиялар каби соҳаларда қўшма лойиҳалар амалга оширилаётгани қайд этилди.

Етакчилар халқаро ва минтақавий хавфсизлик, можароларни тинч йўл билан ҳал этишга қаратилган саъй-ҳаракатларни давом эттириш муҳимлигини таъкидлаб, бўлажак икки ва кўп томонлама тадбирлар режасини ҳам кўриб чиқди.

Суҳбат якунида президент Шавкат Мирзиёев Дональд Трампни ўзи учун қулай вақтда расмий ташриф билан Ўзбекистонга келишга яна таклиф қилди.

• Июль ойи бошида Шавкат Мирзиёев Дональд Трампга АҚШ Мустақиллигининг 250 йиллиги муносабати билан табрик йўллаганди. Мактубда иқтисодий, инвестициявий ва хавфсизлик соҳаларидаги ҳамкорликни кенгайтириш ҳақида сўз борган. Шунингдек, у декабрда Майамидаги G20 саммити доирасида Трамп билан учрашишни кутаётганини билдирган.